شوفتوا أمبارح حصل أية

عشنا وشفنا

شوفتوا أمبارح حصل أية

صباح الخير أو مساء الخير زى ماتكونوا بسلم عليكوا
واهلا بيكوا فى لقاء جديد وعشنا وشفنا
هو ايه اللى بيخلينا نبص على إمبارح وسايبين النهاردة ؟

بس المهم انى عايز اعرف امبارح حصل ايه غير النهاردة ؟
يالا بينا نعرف مع بعض
اولا كلمة إمبارح بتتكون من 6 حروف كل حرف ليه معنى كبير جدا مش موجود النهاردة كل معنى من دول ليه شى كبير عندنا أو نفسنا يبقى موجود ....... تعالوا بقى نعرف مع بعض المعانى دى
أ – احسان
م – مهارات وقدرات
ب- بتثقف
أ- انتصارات
ر- راحة بال
ح – حب

الاحسان :
شئ جميل تربى عليه الناس زمان أن يحسنوا فى أداء عملهم بشكل رائع رجل محسن فى نفسه ومحسن فى عمله وعلشان كده مثلا لو أنت عندك حاجة من زمان مثلا حتلاقيها كده ليه شكل معين ومش جديد وتحس كده انى تقيل كده من الصعب ان يتكرر
زى ايه تلفزيون جدو اكيد عارفينوا لما تروح عند جدو حتلاقى عنده تلفزيون قديم بس ايه حاجة عاليه جدا حتى لو مش مشغله من المستحيل ان يفرض فيه ومش لازم تلفزيون يعنى فى حاجات تانية كتير زى مثلا راديو بتاع زمان اللى هو أبو لمبة ده أو التلفون القديم الاسود ده يااااااااا فكرتونى بأيام جميلة والله كل ده علشان كان فى احسان فى عمل الحاجات دى

مهارات وقدرات :
زماااااااااااان والله أعلم يعنى كانت المهارة والقدرة كانت مكتسبة أكتر من انها فطرية بقول كده ليه علشان كانت المهن متوالية على الاشخاص يعنى الاب النهاردة نجار ابنه يبقى بكرة نجار وكده يعنى فكان طبعا الابن بيكتسب مهارة وقدرة متميزة علشان بيبقى اتربى عليها من هو صغير غير بقى انه ممكن يطور شوية فى المهارة دى فيطلع منتج جديد ورائع مع وجود طبعا الثقافة المجتمعية وطبعا عمرنا ما حننسا فنون العمارة فى مصر الاسلامية وفى بلاد الاندلس والابداع المعمارى كل فرد بيكتسب مهارة بينتج وطبعا بيطور أكتر .
أما المهارات الفطرية اللى كانت موجودة عند الاشخاص اقل حاجة يعنى كان بيطلع حاجة جديدة وانا مش محتاج اقول امثلة يعنى ليه مش حاقول علشان ده واجب عملى عليكوا كل واحد حيحكى قصة من اشخاص زمان اللى عملوا حاجة جديدة تمام .

بتثقف :
الثقافة هو احنا زمان مش كنا شعب مثقف بردوا على الأقل عصر الصحافة كان الواحد اللى شغال صحفى يبقى فعلا ليه دور فى تطوير البلد وازاى كان ليه دور مؤثر فيها وشوفوا كان فى كام جريدة زمان وازاى اثرت فى الشباب وفى البلد من أيام مصطفى كامل الى ايام محمد فريد مرور بسعد زغلول وثورة 19 الى ايام جمال عبد الناصر وثورة52 ومن الوفد الى الجمهورية الى الاهرام الى الاخبار كل دى جرايد اثرت فى ثقافة الشعب والبلد والشباب وكان من الصعب انك متقليش حد بيقرا جرايد علشان كانت هى مصدر ثقافتهم وكان الواحد منهم مش بيشترى بالجريدة والواحدة كان بيشترى بالاربعة علشان يعرف كل الكلام من كل الاتجاهات ههههه الله يرحمك يا جدى ....... غير ان زمان الكتب كانت فعلا رخيصة جدا وكان من السهل ان الشباب يقروا وكان زمان مصدر المعرفة عندهم واحد وهو الراديو ... وهنا القاهرة .... وإذاعة الشرق الاوسط ... فكان عندهم حب معرفة فكانت ثقافتهم واحدة وعلشان كده من الصعب ان تقعد مع حد زمان غير لما يحكيلك عن حاجات لو سالت عليها الغير حيقولك نفس الكلام ... يالا عليه العوض ..... فعلا الثقافة دى رزق من عند ربنا وعلى راى واحد صاحبى .... يافرج ابعت رزق ههههه

انتصارات :
زمان بردوا كان فى انتصارات وغالبا كانت انتصارات شخصية كمان يعنى على المستوى الشخصى والتطويرى والانتاجى وده كان بيدى الواحد منهم مكانة اجتماعية من افندى الى بيه الى باشا الى افندينا وانت طالع ليك وضع على قد تطويرك لذاتك حتى على مستوى الموظفين يقولك ايه انا موظف درجة تاسعة ههههه وكده يعنى فكان بيحاول كل الجهد انه بيترقى وطبعا كان العصر ده المكانة الاجتماعية فيه بالواسطة يعنى قوة السلطة هى اللى مسيطرة اللى تحته ناس هو اللى ليه مكانة وقوة فى البلد ممكن ناس تقولى بس ده غلط ومش صح اقولك ايوة صح بس لازم نبص للوضع فى العصر ده كان عامل ازاى بس ....

راحة بال :
ياااااا مكنش فى تعب ومكنش فى زعل ايوة كان العصر كان صعب فى مجملة بس الناس طيبة و البلد فيها خير كتير والوقت طويل كل ده وفى راحة بال
كل الناس الكبيرة بيقولولى كده راحة البال زمان مكنش فى تعب وصعب الناس كانوا عايشين بالطول وبالعرض كانوا بيحوشوا طول السنة علشان يروحو المصيف وكانوا بيحاولوا يساعدوا
اولادهم ويساعدوهم علشان راحة البال غير العلاقات مع الناس والجيران كان بيوفر لهم اكبر راحة بال يعنى لما يحصلك حاجة تلاقى ناس جنبك كل ده بيوفرلك راحة بالك لما يحصلك ظرف ومحتاج مساعدة او محتاج تتكلم انت حتلاقى اللى حيسمعك وكل دة راحة بال .... بقولكوا ايه ياشباب ما تيجوا نرجع بالزمن لوراء احسن ..ههههههه .....

حب :
اه من الحب ..... افلام زمان تعبر على العصر ده وأظن مفهوم مش محتاج كلام يعنى
هما زمان كانوا بيحبوا بعض بجد ولا زى دلوقتى بيهزروا
على راى انيس منصور لكل زمان حب ولكل حب زمان كنا نقنع بالنظرة ونحلم بالقبلة ( ايه قله الادب دى انا بتكسف ههههه ) واليوم لا قبلة ولانظرة ولا امل فى ذلك .

والله عندك حق وعلى راى بردوا حبيبى عمر طاهر وهو بيقول اقوال عازب شاب على البنات
الست فى العشرين زى السيجارة الكليوباترا لازم تفركها كويس قبل ما تولعها
الست فى الثلاثين زى السيجارة المارلبورو الاحمر سالكة وحامية بس الكتير منها خطر على الصحة
الست فى الاربعين زى الشيشة ماتقومش معاك غير من ثالث حجر
الست فى الخمسين زى السيجارة الميريت الازرق ما تحسش ان بتدخن
الست فى الستين زى السيجار .... ههههههه .... بتطفى لوحدها
هو ده عصرنا يا عم انما زمان ..... احمممممممممممد ...... فتحيةةةةةةةةةة .. قصدى منىىىى
كده يعنى .... ومتسبينيش انا من غيرك مش حعرف اعيش واغانى بقى والحاجات دى
ودلوقتى الولد منهم يعلق البنت 8 سنين جنبه وفى الاخر بصراحة انتى تستهلى واحد احسن منى
نعم يا روح امك .... هههههه بعد 8 سنين ...... وعلى فكرة يبقى ليها مقدمات تتصل بيه يقولها معلش الموبايل فصل شحن وساعة الفراق يقولها والله انا عايز مصلحتك بس هو انتى مش حتستحملى العيشة معايا وعلشان اثبتلك حبى ليكى تعالى نتجوز دلوقتى وساعتها علشان تعرفى مدى صدقة قوليله يالا بينا ههههههههه وشوفى هو حيعمل ايه ابن الكدابة ده .....

بس يا شباب كفاية كده النهاردة والكلام ده مش يخلينى انى افكر فى ايام زمان ولا حاجة ولا اطالبكم انكوا تفكروا فى زمان بس انا بقولوا ليه الناس بتحب ايام زمان علشان فى معانى غايبة عننا كتير واستنونى فى المرة الجاية علشان اتكلم على النهاردة وايه الفرق مابين النهاردة وامبارح وبكرة وعشنا وشفنا ههههههه


سلااااااااام

:ءؤشيضشثضش: رائعــــــــــــــــــــــــــــــــــــــة :ءؤشيضشثضش:

ثانكس

جزاك االله خيراااا

يعطيكـ العاآآآآفيهـ
على المــــوضوع
طرح راقي وانتقآآء ارقى
اجمل التحآآآايا لــكـ

:70: