اخذني الخوف لأخر سالفه بطاريك

تذكير بمساهمة فاتح الموضوع :

اخذني الخوف لأخر سالفه بطاريك
كلت بس لا خبر مو زين....
ويسولفلي واسد اذني لحجي الوهواس ...
وارسم ع الضنون الخوفتني عتاب
خفت يوم الشفت طاريك ..... وي طاري المرض ينجاب
مامش ليل يحجيلي وكتلني الخوف
سترك يا الهي شصاير من مصاب...
ماغنه ونشدت الغبشه ع العصفور
كالتلي اغسل ايدك طالعتله انياب..
من شفت الفخاتي تعلمن ع الصيد ...
ومن شفت الشجر متعلم ع الثار
اخذ من ضلعه فاس وطبر الحطاب..
من طبو لدربي وشالو الخطوات..
ومن شفت السفينه تحكمت بالماي..
على سرب النوارس منعو التجوال ..
واسودت الدنيه بلمه الغربان...
رعدت والمكابر فكت البيبان ...
والدفان راح يحضر السرداب...
كالو غاب ..
لم جادر صفنتك واقفل البيبان
وابجي بلا دمع بجي الزلم ينعاب...
واضحك واكضي دربك والعن الشيطان
واخنك عبرتك واستهده بالرحمن
كلنه عله الدرب ماشين
نصير ونندفن بتراب....
واشيط وناري تصعد واستحي من الناس ...
واضحك و بضحكتي استورح العطاب
ويطفوني بأمل ملكاك ... وانه ادري الامل جذاب
انه فاكد صبح يستحي من النسمات
حطه عله الجرح جره اذني اذا ماطاب
كالو غاب ...
صعبه تغيب ... وانته اول كمر جاب العمر مرخوص
يطلع بالصبح والليل
وانته اول شعر معصوم ... اذن تستاهل الترتيل
واليزرع غصب يحصد ثمر مسموم
واذا يتغربل وماطاح ...
موماطاح جلب كوه بالغربيل
يل معدل اذا راد الشعر خيال
تركض تزرع احساسك ... يطك من في عباتك جيل
ياعيسى الشعر يل ع المرض مصلوب
ومو من السماء من الورد مبعوث
رفع نعش النهر جي مالكاله انجيل
يا اول وضوح يواجه التعقيد ...
عله نيتك يوصل احساسك ...
ماتتعمد التمثيل ....
انته اول قصيده انكتبت عله الكاع
وانته اخر قصيده يخطهه عزرائيل...
من اقرالك سهل .. بس مايمر ع البال
وقلمك ماكتبهه حجايه التنكال ...
يل مأرشف دفو السبعين
والثمانين واهله ولوعه التسعين
ماجنهن قصايد بالحقيقه اجيال ..
وينخاك الفقير وتبني جرحك بيت..
وتفصل الكمر لأبن الصريفه ثياب ...
وتلبس ابن القصور سمال
جازفت وبديتك وادري ما انهيك
ورصيد انفاسك بريتك ... يجبرك من حياتك تعلن افلاسك
رجعت الهث لكيت الوادم اتانيك ...
بعفا عما سلف ماصبرت ناسك
شتلتك نسمه ومتانيك .... بلكي تخضر انفاسك
ينعمه ونقمه ع الحبوك
نعمه وبسمك تباهه الطفل والشيخ ..
خيمه ومارضيت تطيح ... بحبال الفخر مشدود
ونقمه عله اليحط ابياتك براسه..
شيكتب ساعه اليلكاك .. نصأ واصف احساسه..
فتت بيت الشعر وانسد وراك الباب ...
ولحكناك عله دربك والدرب مسدود؟؟
نكلت الليل كله وما خلص طاريك
تاريخك جذر واصل لسابع كاع
منهه ويصعد الما ادري وين يروح
واحساسك يسافر ماتكضه حدود..
يل مغبش كبل لا يكعد العصفور ..
اريد اشبع شعر مو شوف ... خل يكضي الصبح وامشي
الصبح درب النجف مسدود..
رد وياي يا اخر ترف ع الكاع ...
ناسك والكبر مارادو يودعوك ... وانته اطيب كلب للناس
وانته اطيب طعم للدود..
شكل للدجله اذا عرفت بعد متعود؟؟
كلب ام عله كل شاعر ... بقت للان تتنطر ..
ضل بال الفرات من الوضع مو زين..
عله باب الجرف تاناك ... رد وفزز الروجات ...
اكعدو النورس تاخر...
خسرناك وربحنه الحسره جي عفناك
ولو من طحت جنه هواي نتناساك..
يل بطرك الجفن والليل ... يل كلك امل وينك ووين الموت
يل بعازه نفس ضليت ... وانته اول هوه ومسموح .. اله بكل الصدور يفوت..
ياجيه شمس ماضمت المستور ... لكن من رحت بسكوت
حلم صباي وكفته عله امل ملكاك ... طاح بشيله التابوت
كالو مات ...
فزعت النخل يتمدد يتانيك ..اشيلك بيش ؟؟
دورت عله كدك ماشفت تابوت..
جبت نهرين اغسلك بيهن ومافاد ..
لم الماي روحه وعاتب النجمات ...
واجه صوت الجرح بهل المكابر صاح ...
يهل الموت
يهل الموت .... الف هنيالكم عالمات ..........