حَبيبي لِك ثلاث أيَّام .. ..

هذهِ القصيده للشاعره / فاطمه المشيقح ..
مِن أعذبِ الشاعراتِ برأيي ..
وَ هذهِ القصيدة تحديداً / أكثرُ القصائد أستنزافاً لـ ( أدمُعي ) ..
أبكتني كثيراً .. كثيراً ..








حَبيبي لِكْ ثلاث ايَّام .. تُقًولْ لِّي .. يا دِفَا بَـرْدَان؟

و أَبْلَع غِصِّتِي وَ اضْحَكْ و اقُولْ إِي وَ الله بَرْدَانَـه

مضَغْت أحْزَانْ هَالدِّنْيَا عَشَانَ الدَّمْعَـه لِـكْ مَاتْبَـان

و أنَا مَوتِي أَشُوفُ ابُوي مسَجَّى وَسْـط أَكْفَانِـه !

لمَحتِه بَالحِلِمْ مَيِّتْ .. وَ احَاوِلْ أَنْزَعَ الأَكْفَـان ..!!

و كِلْ مَا اوْقَفْ عَلَى حَيلِـي أَطِيـح بْحَـد جِثْمَانِـه

أُبُوي أُبُوي وَ أنَا أَصْرَخْ بْتِقْدَر تَدْفِنِه يَا فْـلاَن ..؟

بتِقْدَر .. تَتْرِكِهْ بَالقَبْـرْ وِحِيـد و مَرْمِـي ابْخَانِـه؟

و قِمْت منَ الحِلِمْ فَجْراً .. عَلى " حَيٍّ " مِـنَ الآذان

كَأَنَّ الدَّمْعْ مِنْ هَمِّي هَرَبْ مِنْ مَحْجَـرَ أعْيَانِـه ..!

توَضَّيت و بَعَدْ فَرْضِي .. جَلَسْت اقْرَأْ مِـنَ القُـرْآن

واحِسِّهْ جَالِس ابْجَنْبِي .. يتَابِـعْ خَـطّ .. قُرْآنِـه !

تِذَكّرْتِه و هُو يَقْرَأ بصَوتِـه سُـورةَ الإِنْسَـان ..!!

و رَبِّي تَدْمَع عْيُونِي لَرَتَّلْهَـا مِـن .. لْسَانِـه ..!!

تصَدِّقْ يَا حمُود إِنِّي أّعَرْف إِنْ كَانْ هُـو جَوعَـان

قَبلْ لا يَنْطِق بْحَاجَه .. أَعَرْفـه بْكِـل أَلْوَانـه ..!!

ودَايِم جَالْسَه جَنْبه .. يسَولِفْ لِي عَنَ اللِّي كَان ..!!

عَنَ ازْمَانٍ مضَتْ / رَاحَتْ و يِتْنَهَّـدْ مَـنَ أَحْزَانِـه

و يتْحَدَّانِي "بِالكَيْرَم" يقِلْ لِـي تِخْسرِيـن رْهَـان

أَتْحَدَّى .. أَغِشّ / آفُوز .. يقٌلْ لِّي "اُوفْ" شَيطَانـه

و أَضْحَكْ ضِحْكِةَ الفَايِزْ و اقُلْ لِّه وَي يَاخَسْـرَااااان

ويَرْمِينِي بْبَعَضْ أَشْيَاء .. و يَصْرَخْ بَي يَا تَعْبَانه ..!

إِذَا دَارَتْ عَلَي دِنْيَـاي كِـذَا وِ اجْتَمْعَـتَ الأَحْـزَان

أَمِيـل انْكَـبّ مِـنْ حِزْنِـي و أتْقَاطَـرْ بْفِنْجَـانِـه

كِذَا يَحْوِينِي بْحِضْنِـه و يِغْنِينِـي عَـن الأَحْضَـان

و أنَا ألْعَـنْ أُبُـو الدِّنْيَـا لصِـرْت آنَـامْ بَحْضَانِـه

صَحِيح إَنِّي مِعِـي رَجْـل و قِبِيلـه كِلَّهـا إِخْـوَان

وَ لَكِنِّه مِكَان الشَّيـخ مَـا يْغَطِّيـه .. وِرْعَانِـه..!!

أَنَا مِنْ كِنْت بَالتِّسْعَه سْنِين .. و مِنَّهـا لَـلآن ..

أَمرّ بْغٌرْفِتًه بَاللَّيل وَ انَاظِـر فِيـه .. وَ لْهَانـه ..!!

أَغَطِّيه .. و أَقَبَّلْه وْ أَخَـاااف يْكُـون بَـسْ تَعْبَـان

و إِذَا حَسَّيتَه يتْنَفَّسْ .. أَرِد آنَـام فَرْحَااااانـه ..!!

صَحِيح إِنَّ الشِّقَاوَة بِي و فِينِـي نَزْعَـةَ الشَّيْطَـان

وَ لاَ أّسْمَعْ كَلامِه دَوم .. و حُبَّه مْزَوِّدَه جْنَانـه ..!!

و لكِنِّي خَفَضْـت الـذِّل و الرَّحْمَـه إِلِـه جِنْحَـان

دعَيتَ الله يَبْقَى لِي و اعِيـش بْظِـل جِنْحَانِـه ..!

أنَا مِنْ لِي ثَلاث شْهُور .. أَقُول اسْمَ الوَلَدْ سلْطَـان

و لكِنِّـه تَغَيَّـر صَـار " عَـبْـدَ الله " عَلَشَـانِـه





:
: