ليتني اعود صغيرة و اخربش بالطبشور

الا ليت الزمن يرجع ×× ورا والا الليالي تدور
ويرجع وقتنا الاول ×× وننعم في بساطتنا
زمان اول احس انه ×× زمانٍ فيه صدق شعور
نحب ونخلص النية ×× وتجمعنا محبتنا
زمن ما فيه لا غيبة ×× ولا حتى نفاق وزور
ياليته بس لو يرجع ×× ونسترجع طفولتنا
صغار قلوبنا بيضاء ×× نعيش بعالمٍ محصور
ولا نعرف ابد اغراب ×× ماغير عيال حارتنا

صحيح صغار في التفكير ×× لكن ما علينا قصور
نخطط نكسر اللعبة ×× وتسعدنا شقاوتنا
نروح المدرسة بدري ×× ونضحك داخل الطابور
نحاول نزعج العالم ×× في روحتنا وجيتنا
وعشان نأخر الحصة ×× نخبي علبة الطبشور
نشاغب بس في الاخر ×× تميزنا براءتنا
نحب الضحك والهيصة ×× نحب ننط فوق السور
نفرفش ليه ما نفرفش ×× ما دام الضحك عادتنا

ولكن دارت الايام ×× وبان الخافي المستور
وصار الهم متعلي ×× على قمة سعادتنا
كبرنا وصارت الدنيا ×× تصف احزاننا بالدور
وتهدينا الالم والهم ×× غصب عن عين رغبتنا
تعبنا من بلاوينا ×× احد ضيق واحد مقهور
وكلٍ غرق بهمه ×× وفي الاخر تشتتنا
وانا ما قول غير الا ×× ياليت ان الزمان يدور
ويرجع للورا فترة ×× نعدل وضع عيشتنا

حتما سوف تعود بك الذكريات ...
___