إن قلت لك بنساك ما والله أنساك

أكذب على نفسي إذا قلت بنساك ... وأكذب عليك إن قلت لك روح مابيك
أزعـل واعـاند وابتعد وتحداك ... يـومين والثـالث بصـوتي انـاديك
يجيبني شـوقي وحبك وذكراك ... وهمسـك وضحكك و التدلع وطاريك
من كثر حبي لك ومن كثر ما أبغاك ... حتى وأنا مجـروح بالحيـل أداريك
اتحمّل جروحك وأدوّر على ارضاك ... وأمشي على كيفك وأتابع خطاويك
أضحك لضحكاتك ويبكيني أبكاك ... ويضيق بـالي لا لمحت الحـزن فيك
ماتدري أن الروح و المال يفداك ... وأن السعـاده كـلها بين أيـاديك
لو شفت حالي يا الغلا عقب فرقاك ... ماغبت عن عاشق جنابك ومغـليك
عاشق كتب قصة غرام بزواياك ... وأبـدعب وصفـه في كتـابة معـاليك
يسهرك ليل إن مر في البال طرياك ... ويلبسك حزن أن جات ذكرى لماضيك
تعال خل الهجر لا يضيع مبداك ... وأرفـق بقلـبٍ كل ليلـه يناجيـك
قلبٍ شكى همّك وضيمك وبلواك ... وجروح تنزف من سبايب تجـافيك
خـلاص يكفي هجر عوّد لمرباك ... مدامني بالحـب للـحين شـاريك
الوصل نعمه و الجفا يفرح أعداك ... أظـن هذي كلمـةٍ من مبـاديك
إن قلت لك بنساك ما والله أنساك ... وأن قلت لك ما أبغاك لا والله أبغيك