حاجات بسيطه ومنتجات رخيصه جربتها وخلت بشرتي تحفه - العضوة منوله

السلام عليكم ورحمة الله

النهارده جايه اكتبلكم تجربتي استخدمت منتجات رخيصه بس فرقت معايا جامد جداااا يعني الحسبه كلها ماتكملش 40 جنيه
وعملت بيهم نظام يومي
جربوم ومش هتندمو

المهم اللي تجرب ميكونش عندها حبوب لان الحبوب لازم تتعالج الاول لان لو اي حاجه جت عليها ممكن تزود الموضوع
اولا انا بشرتي جافه وكانت بتنشف اوي في الشتا وبتقشر كنت بعتمد على الكريم في الترطيب بس مكنش بيجيب نتيجه كويسه
وطبعا البعض منا بيطلعلها حبوب في اوقات معينه من الشهر
المهم الحبوب دي كانت تطلعلي ولما تيجي تروح تسيب اثر لونه بني مكنش عجبني خالص
المهم بعد تدوير كتير وحث عرفت الحل
اولا هقولكم الحاجات اللي اشتريتها وبعد كده هقولكم الطريقه

1- كريم فير اند لفلي صغير +كريم سبوتلس +كريم بيتااديرم+كريم بانثينول 2% ... دول سعرهم مع بعض 19 جنيه
2- صنفرة انجي بالمشمش ب 5 جنيه
3-مية ورد من الصيدليه اللي معايا اسمها بيور ب 4 جنيه
4- كريم ايفا بي وايت النهاري العبوه الصغيره ب 3 جنيه
5- غسول للوش يكون كويس انا عندي ايفا بالجلسرين وجبت جونسون كمان حلو اوي ايفا ب15 جنيه وجونسون ب 25
6- اي كريم مرطب تحبيه انا عندي ايفا برضو بالجلسرين ب 5 جنيه
7- كريم للعين لسه جيباه النهارده هجربه واقولكم النتيجه اسمه shade out هو مرطب وللهالات كمان
ب 20 جنيه


نيجي للطريقه

طبعا الكريمات اللي في نمره واحد هنجيب علبه فاضيه ونضيفه وليها غطي محكم القفل انا عارفه انكم تقريبا كلكم عارفين الخلطه دي للتفتيح وان في ناس بتقول انها مضره بس انا سالت دكتور صيدلي وقالي هتبقي مش مضره لو قللنا كميه البيتاديرم وحطينا معاهم كريم بانثينول لانه مرطب وبيدي نضاره للبشره وخفيف كمان
وبالتالي هتكون الطريقه كده
هنحط علبة فير ان لفلي مع علبه سبوتلس كاملين مع نص علبة البانثينول مع ربع بيتاديرم
ونخلطهم كويس ... ومانحطش من الخلطه دي الا ساعة النوم بس اللي هو تحطيها وتقفلي النور وتنامي ممنوع بتاتا تطلعي بيها في الشمس هتعمل نتيجه عكسيه........... انا كنت بدأت اسمر من خروجي للشغل بس لما جربتها فرقت معايا جامد بالطريقه دي حتى اثار الحبوب بتروح والنمش كمان


هنعمل ايه بقى كل يوم

من بداية اليوم هتصحي تغسلي وشك بالغسول وبقطنه تحطي عليه مية ورد وتمسحي بيها وشك وتطبطبي علي منطقة العين بشويش

بعدها هتحطي كريم النهار من ايفا بي وايت بس متكتريش منه عشان متحسيش انه جير يعني نقطه بسيطه وتسيحيها علي بشرتك لحد ما تتشرب الكريم ده بجد روعه
وتحطي من كريم العين بالطبطبه برضو بلاش تدعكو في عنيكم ابدااااا عشان التجاعيد... بس كده وتخرجو للشغل او الجامعه او اي مكان


هترجعو بليل تغسلي وشك بالغسول بلاش صابون خاااااااالص وترطبيه بالكريم المرطب

قبل النوم
هنستخدم الصنفره وبعدين نمسح وشنا بمية ورد برضو بس المره دي هنحط خلطة التفتيح وكريم العين وعلي النوم يا حلوين
بس كده
حاجه بسيطه مش كده

عايزه اقولكم مش هتحتاجو لمكياج ووشكم هيبقا ناعم زي الحرير ومنور ولا بقع ولا نمش ولا اسمرار
وبتكلفه قليله جدااا بدل ما بندفع فلوس كتير على منتجات غاليه وخلاص

اه وماتنسوش تاخدو فيتامين كل يوم بعد الغدا
انا باخد فيتامين اسمه v 2 plus روعه وب 7 جنيه
جربو وقولولي
هتحسو بالفرق من اول اسبوع
وياريت اللي جرب تيجي تكتب تجربتها هنا في الموضوع


سلام يا حلوين

يعطيكي العافيه
مووضووع مفيدد

طريقة رائعة حقا ... تسلم الايادي الغالية
الله لايحرمنا جديدك وابداعك,,
كل الشكر لك

الله يـع’ـــطــيك الع’ــاأإأفــيه ..
.. بنتظـأإأإأر ج’ـــديــــدك الممـــيز .. 
.. تقــبل ــي م’ـــروري ..
كل أإألــــ ود

معلومات قيمة حقا ... تسلم الايادي الغالية
الله لايحرمنا جديدك وابداعك,,