سامحينى يابلدى

ملينا كل شيء ..

ضايع منا الطريق ..

تايهين يا بلدنا فيكى ..

بحرك عالى وغريق .

هو انتى سر تعبنا ..

والا احنا اللى تعبناكى ؟

شاريانا والا..

بايعانا والا ..

بإيدينا بِعناكى ؟

يابلدنا فين رايحة ..

على فين هتاخدينا ؟

والا احنا فين واخدينك ..

يابلدنا بإيدينا ؟

يمكن نكون بغباء ..

فرطنا يوم فيكى .

بس احنا ما قصدنا ..

نبيع غناويكى .

للى ما يعرف يصونك ..

والا يوم بيحميكى .

سبناكى للى ما يعرف ..

قيمتك ولا يقدر .

عمال بيتصرف ..

فيكى ولا بيعرف ..

يحكم ولا يفكر .

صبحنا مقسومين ..

تايهين ومش عارفين ..

نرسى ولا نقرر .

سامحينى يا بلدى ..

صوتى حزين مبحوح .

ليل نهار بصرخ ..

يمكن بحبك أبوح .

لو مرة شفتينى ..

بضحك على همى .

ابقى ضمينى ..

أبكى فى أحضانك ..

وابكيكى يا أمى .

لو مرة شفتينى ..

برقص والف وادور ..

ابقى سامحينى ..

دى رقصة المدبوح .

اللى مش عارف ..

وليل نهار خايف ..

ياخدوا منه الروح .

من قبل ما يشوفك ..

رافعة لفوق راسك ..

دايسة اللى يوم داسك ..

ساعتها يا بلدى ..

تهون عليه الروح .

شكرا لمروركم الكريم

كلمات اجبرتني علي مشاركتكـ لاحساسي بصدقها

وايمانا مني بقلم يختار اجود المفردات

ماذا أقول لكـ يا سيد الحرف ومنبع المعاني

وبستان الكلام ..المعطره

لك كل مني خالص التحيه
وتحيا مصر

نووووورتوا بمروكم الكريم