{أمي}يا روح الروح

امي لها بالقلب والجوف منزله 
مكانة ماكل محبوب نالها 
  
اقرب من ظلالي وانا وسط غربتي 
وانا تراي اقرب لها من ظلالها 
  
ماشافت اعيوني من الناس غيرها 
ولا خلق رب الخلايق مثالها 
  
اغلا بشر في جملة الناس كلهم 
واكرم من ايدين المزون وهمالها 
  
اتبع رضاها ورتجي زود قربها 
واللي طلبته من حياتي وصالها 
  
الصدق مرساها والاشواق بحرها 
والعطف واحساس الغلا راس مالها 
  
اهيم فيها وابتسم يوم قلبها 
يسأل وانا قلبي يجاوب سؤالها 
  
وان اطلبتني شي فزيت مندفع 
اموت أنا واحمل تعبها بدالها 
  
واصبر على الدنيا والاحزان والتعب 
واحمل على متني فطاحل جبالها 
  
واسهر اعذب راحة القلب بالشقا 
واعيش اعاني بس يرتاح بالها 
  
تربية ابوي اللي على الطيب بذكرة 
اللي وهبني الحياه ومجالها 
  
نور لي ادروبي وانا طفل مبتدي 
حتى تركني واحد من رجالها 
  
الوالدين اولى بالاحسان لجلهم 
وأولى بتكريم النفوس وعدلها 
  
اقولها وانا على الله متكل 
والله عليم بقدرتي واحتمالها 
  
ياكلمة اغلى من الناس كلهم 
ياشمس بقلبي بعيد زوالها 
  
يافرحة تملي لي الكون باكمله 
ياشجرة تكبر ويكبر ظلالها 
  
تضحك لي الدنيا ليا شفت زولها 
مثل السما تزها بطلة هلالها 
  

شعر :حامد زيد

شكراااااااااااااااااااااااااا
رووعه

شكر جزيلا للطرح القيم
ننتظر المزيد من ابداع مواضيعك الرائعه
تحيتي وتقديري لك
وددي قبل ردي .

منورين الموضوع
شكرًا لگم على هذا المرور الرائع

نورتي فطوم