درس الثورة    

درس الثورة

قاعد مَرة ف بيتي..
باحاوِل..
أعرف إيه أخبار الدنيا مِ الجُرنال
ابني صْغيَّر
قاعد هُوا كمان بِيذاكِر
كان قُدّامُه كتاب دِراسات
عَمّال يِقرا بْصوت مسموع:
( ثورة يوليو..
كانت ثورة يوليو بركاناً من قلب الشعبْ
حيثُ تحققّ حُلمُ الأمة
ومضى عصرُ الظلمِ والاستبداد
ونالَ الشعبُ الحقَّ الضائع
وتخلَّص من عهدِ الإقـ...
ـطاع... )
***
وسكت فجأة
بعد شوية نَدَاني وقال لي:
بابا.. يا بابا
أنا مش فاهم معنى الدرس اللي انا باقراه
سِيب جُرنالَك ياللا يا بابا
واحكي لي عن ثورة يوليو
***
بيني وبينكم
أنا ما عْرِفتش اردّ عليه
هاحكي ازاي عن ثورة يوليو؟
وهاقول إيه؟
لو قلت لُه: كان فيه "ثورية".. وْ "دكتاتورية"..
وْ "فرض حْماية".. وْ "رأسمالية"...
مِشَ يفهمني
طفل وعقلُه ما يِستحمِلْش كلام ف سياسة
لو قلت له: "ضُبّاط أحرار" أو "أسلحة فاسدة"...
برضُه كلامي صَعْب عليه
طب اقول إيه؟!!
***
قلت له: سِيب دَرْسَك دلوقتي
وتعالى احكي لك حَدُّوتة
.........
كان يا ما كان
كان فيه مَرة... شَعْب أصيل
عايش على أرض اسمها "مصر"
بيحبّها ويموت ف ترابها
هيه كمان كانت بتحبُّه
عاشوا كتير في تبات ونبات
جابوا كتير صُبيان... وبنات
لكن فجأة
حاكم ظالم
إيدُه اتمدّت... طال العرش
أصبح مالِك خِير الشعب
كا حواليه حَبّة شياطين
بمساعدتهم
قال انا مالك كل حقوق المصريين
كان لُه جيش
جُوّا الجيش.. كان فيه مجموعة ضُبّاط
كان النيل بِيْسِيل ف عروقهم
يِروِي قلوبهم... تطرَح نخوة
قالوا: يا مصر..
ازاي إنتي تبقي بلدنا وْمالناش فيكي أي حقوق؟!
قُومي يا مصر
إحنا الضباط الأحرار
لما الجنة.. تكره حدّ بيسكُن فيها.. تصبح نار
قومي يا مصر..
لازم نقطع راس الأفعى
***
وف يوم أبيض
في تلاتة وعشرين من يوليو
كان الظلم بينزل من فوق كرسي العرش
يومها الحق رجع لاصحابه
يومها الشعب رجع لترابه
دي يا ابني حدُّوتة الثورة
إيه رأيك؟
حلوة الحدُّوتة؟
***
ردّ عليا وقال لي: يا بابا..
هيه الثورة..
مش رجَّعت الحق لصاحبه؟
قلت له: أيوا
قال لي: يا بابا..
هيه الثورة..
مش خلَّصت الناس م الظلم؟
قلت له: أيوا
قال لي: الثورة.. مش بترجَّع حاجة بتاعتي..
غِيري واخدها؟
قلت له: أيوا.. بتسأل ليه؟!
ردّ وقال لي:
طيّب ليه ما نقومش بثورة..
علشان ترجع لينا "القُدس"؟
***
لما سألْني..
غَصْبٍ عني..
دمعة عيني بَقِتْ ع الباب
مكسوفة تنزِل قُدّامُه
فرفعت الجُرنال بإيديا..
غطّيت وِشي..
وقَرِيت الأخبار..
وغرِقت !
***

بارك الله فيك (ي) علـى المـوضوع الجمـيل والطـرح الممـيز
أفـدتنا بمـعلومات قـيمة ومفيدة جـزاك الله خـيرا
نحـن في انتظـار مواضيـعك الجديـدة والرائـعة

يسلمووو على النقل والطرح
يعطيك العافية
وشكرا الك

يسلمو ي الغاليه على القصه 
ووتسلم يدك ي قلبي َ انت ِ 
والله يعطيك العافيه حنونه 
وننتظر الجديد منك ِ 
ووشكرا 
+
ينقل