يقول الشاعر
يا سايق التكسي أنا فكر متشتت /أحلم بثورة لكن في جو رومنسي .
*مالكم بالطويلة
أول ما تقاعد الشايب وبتكية القهوة العصرية قال أنا بشتري تكسي وحنا مازلنا شباب والتقاعد ما يدل ع الشيب
الحمدلله ما قال أخطبلي المهم قلت يا بوي الله يجزاك خير ختمت أم العسكريه وش لك بالكده ووجع الراس قال قم قم بس غسل الفناجيل (ما جاز له كلامي ) والله ويشتري التكسي ويبدا يكد وياخذ اسبوعين وما جاز له الشغل وهو يجنب التكسي ويرجع للشغل القديم (تطفية المكيفات واللمبات فالبيت) وقتها كنت ع وشك التخرج وتعرفون نظام الخدمه المدنية عندنا ما شاء الله وظيفتك جاهزة ما تنتظر كم سنه المهم أني جيت لابوي قلت يا تمشي لي راتب ولا عطني التكسي أكد مثل الرياجيل وابني نفسي وكلام كذا يعني قال يا ولدي والله الظاهر أنك مثلي أسبوعين وتوقفه عند البيت (أزين ما فيني أنا وابوي فاهمين بعض )
;المهم أني أخذت المفتاح ومن هنا تبدا القصص
بدأت الرحلة وتعرف ع أصناف الناس وعقولهم
لو تسألني عن الرحلات سأقسم لك ثلاث أقسام
1_الشيبان أما الذكور الصراحة هم عله يسولف عليك وتقلب مزارق طيب (أي تحلف أنه ما يحاسب) وبعضهم الله وكيلك تقمط أم أم العافية يوم يقولك كم الحساب علشان ما تجيه جلطه
*العجز الحريم يا حليلهم تقول عشرين تعطيك ثلاثين وعلى السجيه وما تناديك الا يا ولدي (مهو كلهم طبعا)
بعضهم ناقصهم مكنسه وتصير زي الي بالرسوم المتحركة
2_ الشباب الغالب تطيح الميانه بسرعة وحتى المكاسر ما يجي كثير ويجي محالف بينكم والسعر الي تقوله بالغالب أنك تاخذه
*ملاحظه:
الحريم هذولي يبغالهم مجلادات حتى توصف معاناتك
معهم بعضهم الله وكيلك تقلب أم خماس آخر كم كم آخر واذا ما أعجبها السعر عطتك نظرة الي تراي أدري أنك تلعب علي بس مستعجله وبعضهم تحس أنها تبي تحلل الفلوس توقف بالطريق ثلاثين مره الظاهر لو تشوف مكتبه قبل بيتهم تقول وقف بشتري دفتر (هي ما تبيه بس تحليل فلوس ) واذا صكت الباب تقول تصك باب جهنم ماهو سيارة ، بعدين عليهم سوالف (يتسمع ابو الشباب ) أذكر مرة كنت لابس بدله (بنقالي) وركبت معي وحده وهي تكلم جوال وخرت الجوال شوي وقالت صديق روح سوق رياض مول ورجعت تكلم حسب ما فهمت من المكالمة أن زوجها ما دبر لها فلوس المهم الله وكيلك من كثر ما هزأت زوجها بغيت أوديها حقوق الانسان ثم سجن الملز وصلنا السوق وقالت كم قلت عشرين وانصدمت أني سعودي والحمدلله أني ما تهزأت جنب زوجها.
*مواقف لا تنسى
ركب معي مره واحد نفسيه الخط زحمه وأبي أقطع الزحمات بالسوالف قلت ما تعرفنا على الاخ قال ليه تبي تناسبني (قصف جبهتي ) المهم قلت هين والله لا أردها بعدها بشوي هو تقول طفش قالي التكسي لك ما شاء الله قلت الحمدلله قال عسى تطلع منه خير قلت ليه تبي تشاركني (ماني رخمه رديتها له بقوه )
* ركبت معي حرمه وذاك اليوم ذبحتني الدوجه مالقيت ركاب المهم وقامت تكاسرني تكاسرني وركبت معي بنفس شينه قالت وقف عند مطعم وهي تطلب جاب العامل الباقي وعلشان تعاندني قالت للعامل خذ الباقي المهم وانا أشغل العداد والحسابه تحسب قالت ليه تشغل العداد تبي تزود علي قلت أجل توقيفه ببلاش تبغين ولا أنزلي قالت لا خلاص رجعني للمكان الي أخذتني منه (يا ذا الليل والمشوار الاقشر)
*ركب معي مره عسكري واشغلني يقول استعجل استعجل متاخر ع دوامه أبو الشباب لين صورني ساهر عاد مع التصويره كان يشكي لي من ضابط ويقول الله لا يوفقه قلت الله لا يوفقك أنت حسابك عشره والمخالفه ثلاث ميه
* مره ركب معي واحد ومع السوالف قال أمانه ما فيه مزز يركبون معك هههههه قلت والله لو أني فاتح مرقص ولا كازينو
*صدق مسلسل طاش ما طاش بخصوص بعض الحريم الي ما تركب مع سعودي رغم تطور المجتمعات إلا أن النظره لم تختلف .
-مع التطبيقات الجديدة كريم وغيره سقط سوق الليموزينات بشكل كبير لا يهمني الاجنبي بقدر المواطن وأغلب سيارات التطبيق ملك للمقيمين
*خاتمة
نفس ما قال الشايب ما طولت شهرين ولبقت التكسي عند البيت وحولت النشاط كامل لكن أنا عندي سؤال صدق ليه بعض الحريم ما يركبون مع السعودي
, عزيزي الزائر / عزيزتي الزائرة منتَدَاكمً مُنتَدَى الملوك يُرَحبُ بكـُمً .. 
إنً كنتَ تَرغَب في الإنضمَامً إلى أسًرَة المنتَدَى سَنتَشَرَفُ بتَسًجيلَكَ .. فَمرُحَبا بالزَائرينَ , وَ العَابرينَ , وَ الأصدقَاء , واَ لأعضَاءَ , بالطَيبينَ وَ الطَيبَات 
.. وَ بكًل مَن يَثًرَى , أوً تَثُرَى المًنتَدَى بالحِوَارً , وَ المُنَاقَشةَ , وَ المسَاهَمَاتً المُفيدَةَ .. فَلَيًسَ للبُخَلاَء بالمَعرفَة مَكَانُُ هُنَا 
..سَاهمَ / سَاهٍمي بكَلمَة طَيبَة , أوً مَقَالً , أوً لَوًحَة , أوً قَصيدَة , أوً فِكرَة , أوً رَأي , أوً خْبرَة تَدفَعً حَيَاتُنَا للأمَامً ... تحيَآت إدَارَة منتَدَى الملوك 
") 
ــلمت الانــــامل الــ...ــراق،،يــّّــة
