رواية بقراري ضيعت نفسي و أحبابي / كاملة 2014 الاول

تذكير بمساهمة فاتح الموضوع :

البندري 15 سنه يتيمة الأب....
أختها الكبيرة مشاعل 20 سنه متزوجة بسام 27 سنه ما عندهم عيال....
سعد أخو البندري الكبير 29 سنه.... متزوج الجوهرة 24 سنه ولدهم الصغير راكان عمره سنتين.... الجوهرة مسيطره على سعد وطمعانه بفلوسه.... ودايما تبعده عن خواته....
أم بسام رضعت البندري مع بنتها.... فبسام زوج أختها وأخوها من الرضاعة....
تركي 24 سنه من الدمام.... طفش من مشاكله مع أبوه وترك الدمام.... درس واشتغل بالرياض بس حياته ضاعت وبسبب أصحابه....

مسكت يده وهي تبكي: ليه تسوي فيني كذا... حرام عليكـ أنا أحبكـ
سحب يده: هيه أنا ما جبرتتس تجين معي... جيتي لي برضاتس
خلود برجاء: طيب متى تجي تخطبني
ابتسم تركي: أخطبتس؟؟ هههههههههه حلوه هذي... ـ وهو رايح للباب: وأنا خبل عشان أخطب وحده تعرف عشره غيري
خلود شوي وتنهار: صدقني أنا ما عرفت غيركـ... والله إني ما أعرف غيركـ
فتح تركي الباب وناظرها وعلى وجهه أكبر ابتسامه.... وقال: طيب صدقتس... بس حظتس هو اللي رماتس عند واحد مثلي ههههههههههه
انقهرت خلودأنك.تشوفه شيطان بهيئة إنسان.... قالت: صحيح أنكـ .###.. و.###.. والله لأدفعكـ الثمن غالي يا تركي
تركي مبسوط: لا يكثر هرجتس... محد ضربتس على إيدتس وقالتس حاكيني... يللا خذي أغراضتس والحقيني
طلع تركي وجلست خلود بطرف السرير وبكت.... لأنها دفعت ثمن استهانتها بالمكالمات والثمن كان غالي على أي بنت.... ما تدري كيف تواجه أهلها بعد اللي صار وبسبب حبها وثقتها بتركي....
تركي!! تذكرته وقامت وجمعت أغراضها.... خافت يتركها وهي مو عارفه الطريق لبيتها.... سكرت باب الشقة ونزلت تحت.... ركبت السيارة وتفاجات من اللي شافته....
شافت تركي يحط بودرة بطرف يده وقرب أنفه وشمها....
قالت بصدمة: أنت ممـ..مدمن
تركي بعد ما أخذ الجرعة سند راسه لرتبت السيارة وهو يضغط عليه، ثواني وبدا مفعول المخدر....
خلود مصدومة أول مرة تشوف ها الشيء ع الواقع.... قالت بخوف: تر..تركي أنت مدمن
ناظرها تركي ثواني وبعدها ضحك: هههههههههه إيوه... شفتي يا خلود... أنتي ما ترضين تاخذين واحد مدمن... وأنا ما أرضى على نفسي آخذ وحده تعرف عشره غيري
كرهته خلود وكرهت كل شي فيه.... قالت وهي مقهورة: رجعني المجمع... طلعني من ها القرف
تركي بعالم ثاني: متى بشوفتس مرة ثانية
خلود وخلاص بتنفجر: تركي... ودني المجمع يللا
شغل تركي السيارة: طيب... طيب بوصلتس المجمع... بس إذا وصلتي البيت طمنيني عليتس
خلود: الله ينتقم منكـ... الله يحرق قلبكـ مثل ما حرقت قلبي... ـ وظلت تدعي عليه الين وصلها للمجمع اللي خذها منه....
مشى وتذكر ربعه وقرر يروح لهم.... يغير جو ويوسع صدره.... دخل للشقة وشافهم جالسين يلعبون بلوت....
منصور: اووه هذا تركاان جا
جلس تركي: وش السالفة... أشوفكم عزابيه اليوم
فايز: إيوه قلنا اليوم استراحة
بعد فترة رن التلفون.... رد تركي بصوت ثقيل من بعد ما شرب كم كاس خمر.... وكان أبوه متصل وعرف أبو تركي أن ولده سكران.... وكالعادة يهزئه ويدعي عليه وعلى أمه اللي جابته....
تركي يكلم أبوه وهو مقهور: دام مو طايق أمي ليه تجيبني بها الدنيا... ليه ما قتلتني وريحت نفسكـ
سكر تركي الخط بوجه أبوه وضغط راسه.... خلاص تعكر مزاجه....
منصور: تركاان لا تزعل ولا شي ترى ما يقصد... مو من قلبه
تركي: أسكت واللي يعافيكـ
فايز: وين رايح
تركي: ما يخصكـ
طلع تركي من الشقة وركب سيارته ومشى.... ما انتبه للإشارة إلا لما سمع هرن سيارة مسرعة.... ما قدر صاحب السيارة يخفف سرعته وصدم تركي.... اللي تقلبت به السيارة، ثواني والكل تجمع حوالين سيارته....

دخلت المستشفى من بعد ما وصلها أخوها وتركها.... راحت للاستعلامات....
البندري: لو سمحت وين غرفة مشاعل عبد العزيز العاصي
ناظر الموظف الأوراق وبعدها قال: غرفة 310 الدور الثالث
ما انتبهت للطريق وراحت لقسم الرجال.... ودخلت غرفة 210 وما شافت حد بس انتبهت على حد نايم بالسرير ومتغطي بالكامل.... حطت شنطتها بالسرير ونزلت البرقع ومسحت شعرها الأسود الكثيف.... جلست على طرف السرير وقربت راسها من أختها المتغطية وقالت بهمس: مشاعل... شعوله أصحي
تركي اللي كان يحاول ينام استغرب لما حس بأحد دخل غرفته خمن أنه الدكتور أو ممرض وما تحركـ.... بس أنه تفاجئ لما حس بأحد جلس جنبه.... واستغرب لما سمع صوت همس.... شال الغطا وانصدم لما شاف بنت عنده بالغرفة....
فتحت البندري عيونها ع الآخر لما شافت رجال نايم بالسرير.... وقفت وتراجعت وهي تتلفت يمين وشمال تبي تتأكد هذي غرفة أختها ولا لا....
رجعت ناظرته وقالت: وش جابكـ غرفة أختي
تركي كان مبهور من الملاكـ اللي قباله.... غطاها وعباتها على كتفها وكم خصلة سوده على وجهها.... خدودها موردة من الحر وغير عيونها الناعسة....
البندري شافته مفهي عليها.... حركت يدها بوجهه وقالت: هيه أنت يا الحبيب وش جابكـ غرفة أختي
ابتسم تركي لما سمع صوتها الطفولي: أنتي اللي وش جابتس غرفتي
شهقت وطلعت تتأكد من رقم الغرفة وصارت غلطانه.... رجعت وعدلت غطاها وخذت البرقع وشالت الشنطة وطلعت....
تركي كان يراقبها يحس بإحساس غريب يجذبه لها.... هذي البنت غييير عن البنات اللي عرفهم.... بنوته صغيرة وحلوة وفيها براءة.... انتبه عليها طلعت وطلع وراها من غير ما تدري.... شافها دخلت غرفة، ناظر رقم الغرفة وعرف أنها مو متقصده تدخل غرفته.... راح وفي باله ألف فكرة....
دخلت الغرفة وهي تلهث....
مشاعل: وش فيتس يا بنت الناس علامتس خايفه
البندري: وش أقول... وش أحكي
بسام: الحمد للهوالشكر... جاية تركض وتبي تسوي رياضه بالمستشفى
ناظرته البندري بنص عين: أساسا أنا رشيقة مو مثل بعض الناس
مشاعل: أنا؟؟
البندري: مهوب أنتي... أقصد زوجتس الفاضل
ضحكـ بسام: هههههههههه بالعكس هذا دليل الصحة
البندري: أسكت بس... خلني أقول لكم وش صار معي..........
بسام: خبله والله العظيم خبله
مشاعل: وش جابتس غرفة الرجال
البندري: والله ما انتبهت للطريق... وش أخبار صدرتس الحين أحسن
مشاعل: الحمد للهارتحت من بعد البخار
البندري: وش تسوي برة التهوية والغبار كان قوي أمس
مشاعل: كنت بدخل ملابسي عن الغبار
بسام: ومن الأهم ملابستس ولا صحتس... بغيتي تموتين علي أمس
مشاعل: خايف علي
بسام: أكيد خايف عليتس... أنتي زوجتي وحبيبتي وروحي ومقدر على فراقتس
استحت مشاعل ونزلت راسها....
البندري: نحن هنا
بسام: ندري أنتس هنا
البندري: وراكـ ما تنتظر الين ما أتزوج... وبعدها تغزل بزوجتكـ على كيفكـ
بسام: وحنا قلنا لا... تو رجال خطبتس وأنتي رفضتيه وهو ما عليه كلام
البندري: العيب مهوب برجال العيب بأخوي المحترم
بسام: سعد!!... ليه
مشاعل: سعد يبي بنوو تتنازل عن نصيبها من شركة أبوي... ولا ما راح يزوجها
البندري: شفت يخيرني بين الزواج والشركة... مثل ما سوا مع مشاعل
توقع بسام ذا الشي وقال: الله يهديه... بس يا بنوو وش تستفيدين من الشركة خليها له
البندري: لا... مالي إلا ها الشركة، كفاية أنه حرمني من ثانوي... كل صديقاتي بيدرسن بالثانوية وأنا محرومة من أبسط حقوقي
مشاعل: وكل صديقاتس تزوجن يا بنوو وكل وحده عندها بيتها وزوجها
البندري: زواج منيب متزوجة... لا تحاولون معي منيب متزوجة
بسام: الله يهديتس... يللا يا مشاعل جهزتي أغراضتس
مشاعل: إيوه يللا

بنفس الوقت
راح تركي للاستعلامات وسأل عن غرفة 210.... وعرف أسم مشاعل بالكامل.... وعرف أنها بتطلع من المستشفى اليوم.... كان واقف قبال الاصنصيل عشان يشوفها.... جا له صديقه الصدوق بدر اللي ما تخلى عنه ودايما ينصحه....
بدر: يللا يا تركي مشينا
تركي: لحظه
بدر: ليه تحتري حد
تركي: إيوه
فتح باب الاصنصيل وشافها وعرفها من عيونها.... لما شافته نزلت عينها ومشت ورا أخوانها....
تركي: بدر مشينا
بدر: وين اللي تحتريه
مشى تركي: تعال لا تأخرني
طلعوا وركبوا السيارة....
تركي: الحق ذي السيارة
بدر: ليه
تركي: بدر ألحقها وما عليكـ
بدر: الظاهر الحادث أثر بمخك مهوب براسكـ... ـ شاف نظرة تركي وقال: يللا
طول الطريق وهم يلحقون بسام.... الين وقف ونزلت البندري وشافها تركي تدخل واحد من البيوت.... ناظر البيت العادي ومشوا لشقة....

دخلت البندري البيت وشافت أمها وزوجة أخوها بالصالة....
البندري: السلام عليكم
أم سعد: وعليكم السلام... ها بنوو وش أخبار مشاعل
البندري: بخير... توها راحت البيت مع بسام وبيجون بعد شوي... عن أذنتس يمه بروح أتروش
راحت غرفتها وتروشت وبعد ما جهزت نزلت الصالة وخذت الريموت وغيرت القناة....
التفتت الجوهرة: ومن قالتس تغيرين القناة
البندري: والله أنا ما أتابع مسلسلات مكسيكية
أم سعد ساكته لأنها متعودة على هواشات البندري والجوهرة....
الجوهرة: ومن متى ها الالتزام... أقول هاتي الريموت بسرعة
البندري بتحدي: لما يكون البيت بيتتس أحكي
انقهرت الجوهرة ووقفت بوجه البندري: بتعطيني الريموت ولا كيف
وقفت البندري: ما راح تاخذينه وش بتسوين
دخل سعد ورمت الجوهرة نفسها بالأرض وبكت.... تفاجات البندري وأمها....
الجوهرة وهي تبكي: الحق علي يا سعد
سعد: خير وش صار
الجوهرة وهي تبكي بصوت عالي: أختكـ ذي تبي تذبح ولدكـ ورمتني بالأرض
البندري: أنا؟؟ أنا اللي رميتس... ما أقول إلا حسبي الله ونعم الوكيل فيتس
وما انتبهت إلا وذا الكف اللي رماها بالأرض وطلع الدم من طرف فمها....
عصبت أم سعد: سعد
سعد طنش أمه وصرخ: تذبحين ولدي... ولد أخوتس
وركلها كذا ركله ببطنها وهي تصرخ من الألم: آآي والله زوجتكـ كذابة... آآي حرام اللي تسويه فيني
الجوهرة ابتسمت ابتسامة انتصار.... أما أم سعد تحاول تبعد ولدها عن بنتها بدون فايدة....
جر سعد شعر أخته وقال: أنا منيب فاضي الحين... ولا كان حرقتس بالنار... وأسمعي لو تموتين ما راح ترتاحين إلا لما تتنازلين عن الشركة... ـ ضرب راسها بالأرض والتفت لزوجته: يللا حبيبتي قومي أوصلتس لطبيب
قامت وهو يساعدها توقف.... طلعوا من البيت ووصلوا السيارة إلا بسام ومشاعل واصلين.... مشاعل شافت نظرات الجوهرة وخافت" أكيد صار شي "....
دخل بسام ومشاعل الصالة وشافوا البندري منطويا على بطنها وتبكي.... وأم سعد تهديها....
مشاعل: بنوو وش فيتس... يمه وش صار
أم سعد بقهر: حسبي الله عليتس يا جوهرة
بسام: عمتي... وش سوت ها الـ.##
أم سعد قالت لهم اللي صار....
البندري من بين دموعها: أنا كنت أتوقع ها الشي ما يصير إلا بالمسلسلات بس صار حقيقة
نزلت دمعة مشاعل وهي تمسح الدم من فهم أختها: الله ينتقم منها
البندري وهي تبكي: كفاية أنا تعبت ما عاد أبغى الشركة... ولا أبي حلالي كفاية ما فيني أتحمل
بسام: ربتس يا بنوو ما يرضى بالظلم... وبيجي يوم ويعرف سعد ها الشي

بعد كم يوم....
في الاستراحة، تركي اللي كان جالس مع ربعه.... هذا يشرب وهذا يغازل.... أما تركي بعد ما أخذ جرعة المخدر.... تذكر كل الكلام عن البنت اللي قابلها بالمستشفى.... وعرف كل شي عنها وعن ظلم أخوها لها.... كانوا أخوياه فالينها بالخمر والأغاني والرقص.... وهو ولا على باله....
ما يدري ليه سأل عن البنت وليه هي بذات اللي قبلت تفكيره.... يمكن لأنها عايشه بظروف مشابه بظروفه....
كان معهم وتفكيره بمكان ثاني" كيف أساعدها.. أخوها هذا ما فيه ذرة رحمة.. فكر يا تركي.. كيف أساعدها.. أتزوجها؟؟ إيوه بتزوجها.. وأهلي؟؟ تفكر بأهلك اللي ما يدرون عنك.. من جد كاسرة خاطري.. من يصدق سعد العاصي بها القسوة مع خواته.. ع الأقل إذا تزوجتها بفكها من ها الظالم.. وأخوها يموت ع الفلوس.. بمجرد يعرف أنا أبوي سلمان العالي بيطير من الفرحة "....
منصور وهو يملي الكأس ثلج: تركاان وش فيكـ
تركي سرحان وما يدري عن صاحبه.... أخذ منصور علبة المناديل ورماها على تركي....
عصب تركي لأنه قطع أفكاره: وجع... وش تبي
منصور ولسانه بدا يثقل: وش فيك سرحان... مهاوشكـ الوالد
تركي مو رايق: خلكـ بحالكـ
منصور وهو يرفع الكأس: لا يا تركاان عش حياتكـ... ترى الدنيا ما تسوى
وقف تركي مو قادر يفكر بوجود ها المزبلة.... توه بيمشي جا له فايز ومسكه من كتوفه وهو مو قادر يتوازن وقال: وين رايح
عصب تركي ودفه: أبعد أقرفتني
طلع من عندهم وراح شقته وهو مصمم يخطب البندري....
.
.
.
بعد أسبوع راح تركي لفيلا سعد وكلمه بالموضوع....
سعد: طيب يا تركي... ما قلت لي من هو أبوكـ
تركي: سلمان العالي
تفاجئ سعد: أنت تركي بن سلمان العالي
تركي: إيوه
سعد: والنعم فيكـ يا ولد العالي
تركي: الله ينعم بحالكـ... أنا أبي أتزوج أختكـ... ـ بتردد: بس ورا أهلي الين ما أضبط أموري هنا وأقولهم... وش قلت
سكت سعد ثواني وهو يناظر بتركي.... " الله يا الدنيا هذا تركي ولد خالتي وفاء.. هه جاي يخطب بندري وهو ما يدري أنها بنت خالته.. وهذا المطلوب "....
سعد عارف عن سوالف تركي الشينه.... بس فلوس أبوه تشفع له.... ما همه أخته أهم شي أنه يفتكـ منها وياخذ الشركة له....
سعد: والله يا تركي أنا مبدئيا موافق... بس أنا شارط على أختي شرط ما تتزوج إلا لما تنفذه... وإذا وافقت ونفذته مالكـ إلا اللي يرضيكـ
ابتسم تركي لأنه عرف أن سعد ما همه إلا شركة أبوه: على خير إن شاء الله ورقمي عندكـ
بعد ما طلع تركي ظل سعد يفكر الين جت زوجته....
الجوهرة: وش يبي ذا جاي عندكـ
سعد: هذا تركي ولد خالتي وفاء اللي كانت ساكنة بالدمام
الجوهرة: جد!!
سعد: إيوه... بس الحلو بالموضوع أن تركي ما يدري أني ولد خالته... أساسا ما يدري إن له خاله بالرياض
الجوهرة: طيب وش عنده جاي إذا ما يدري عنكم
سعد: جاء يخطب البندري
الجوهرة: وطردته
سعد: لا طبعا... أنا اللي أعرفه أنه واحد كئيب ومعقد... تدرين أنه عايش هنا من ست سنين
استغربت: ليه؟؟
سعد: لأن علاقته بأبوه وإخوانه مو زينه... وخصوصا مع أبوه، حتى أن أبوه هو اللي طرده من البيت
الجوهرة: ليه
سعد: هه راعي سوالف... يعني خمر حشيش بنات
ضحكت الجوهرة بشماته: هههههههه والله أنه مناسب للبندري
سعد: بس في مشكله وهي أنه يبي يتزوجها من ورا أهله... وأنا خايف أنها ترفضه لها السبب
الجوهرة بحقد: مو ضروري تعرف... وأظن أنها بتوافق ها المرة من بعد ضربكـ لها... وهذي فرصتكـ أنا سمعت أن أخوها بسام مسافر
سعد: تهقين توافق
الجوهرة: أكيد... بس تذكر لا تقولها عن أهل الرجال... وأنت أتفق معه أنه يقول ما عنده أهل... يعني مقطوع من شجرة بس لا تنسى تحذر أمكـ... لأنها تعرف ولد أختها وإذا قالت له أنها خالته، أبوه بيرفض لأنه أساسا متزوج أم تركي غصبن عنه... كيف بيرضى يزوج ولده بنت خالته
سعد: ما فهمت قصدتس
الجوهرة: قصدي تحاول تقنع أمكـ عشان تكلم البندري عن ولد خالتكـ بدون ما تقول لها أنه يقرب لكم... وأنت قايل أنكـ ما بتزوج البندري إلا بعد ما تتنازل... وهذا العريس جا
اقتنع سعد: صح كلامتس
الجوهرة: وش تحتري... أتصل عليها
طياري أتصل ع البيت وردت أمه....
أم سعد: الوو
سعد: هلا يمه
أم سعد: وش عندكـ متصل... أي مصيبة جبتها لنا
سعد: افاا يمه أنا أجيب لتس المصايب
أمه: إيوه... ما خبري يجي من وراكـ الخير
سعد: جايب عريس لبنتس هذا تسمينه مصيبة
أمه: وأي بلوى تبي ترمي أختكـ عليه
سعد: ولد أختس يمه
أمه بصدمه: تركي؟؟
سعد: إيوه... بس ترى تركي ما يدري عنتس يظن أن أمه وحيدة أهلها... وهذا أنا أقولتس ما أبي تركي يدري أنتس خالته... ولا أبي أحد تدري عنه بس حاولي تقنعين بنتس فيه
أم سعد ما بيدها حيله: ليه يا سعد... ليه تحرمني من ولد أختي... كفاية أبوه حرمني منه من بعد ما توفت أمه
سعد: يمه ولد أختس اللي فرحانة فيه خربااان... تعرفين معنى خربان يعني له سوالف بطاليه وكل بلاوي الدنيا فيه
أم سعد بحسرة: مو منه... من أبوه وزوجة أبوه الله يسامحهم... بهذلوه الين ضاع ومحد ضيعه غير عيال الحرام
سعد: طيب يمه وش قلتي
أم سعد: أنا وولد أختي نعرف لبعض بس أنت أطلع منها
سعد: بطلع منها بس بشرط بنتس تتنازل عن الشركة... وما أبي أحد يعرف إن تركي ولد أختس ولا والله لادخلتس لدار العجزة
أم سعد خافت من دار العجزة: خلاص يا سعد بعد أسبوع نرد عليكـ
سعد: مع السلامة
سكرت أم سعد وهي تفكر بولد أختها.... تتمنى تشوفه وتاخذه بحضنها لأنها عارفه أنه محتاج لها.... بس أنها خايفه من ولدها.... وخلاص مو لازم يدري تركي أنها خالته.... أهم شي يكون ولد أختها عندها....

بعد أسبوع....
وافقت البندري عشان ترتاح من أخوها وزوجته.... تنازلت له عن الشركة.... وبعد أسبوعين جا بسام وعرف بالموضوع وكان يوم ملكة البندري على تركي....
مشاعل: وش فيكـ يا بسام شكلكـ متضايق
بسام: مدري... قلبي مو مطمن من ولد العالي
مشاعل: ليه سمعت عنه حاجة مو زينه
بسام: لا بس إحساس... وش أخبار بنوو
مشاعل: مبسوطة... مثل أي بنت بتتزوج
بسام: الله يوفقها إن شاء الله
كانت جالسه بالغرفة الداخلية خايفه ومرتبكة.... دخل أخوها سعد ومعه بسام وتركي.... دقايق وتركوا البندري وتركي لحالهم....
ابتسم تركي وهو يناظرها.... شكلها بريء مستحية منه ومنزله راسها وتفركـ يدينها.... كان يظن ها النوع من البنات اختفى.... بس هذي البندري زوجته وحلاله.... حس أنها ما تستاهله وخاف أنه يظلمها....
تركي: كيف حالتس يا بندري
البندري منزله راسها: الحمد... أحم الحمد لله
تركي: في شي بالأرض
استغربت: بالأرض
تركي: إيوه ولا ليه منزله راستس... فيتس تشوه ما أدري عنه
رفعت راسها وشافته وتفاجات ونزلت راسها مرة ثانية....
ابتسم من حركتها: ما توقعتي اخطبس صح
هزت راسها وابتسمت....
تركي: المهم أنا أعطيت مهرتس لسعد وقلت له يعطيتس إياه
البندري بحياء: مشكور... ـ وبخاطرها" لا بالله أخذت مهري "....
تركي: عموما أنا أجرت شقة صغيرة و...
رفعت راسها وقاطعته: لا أنا أبغى أمي معي
تركي: طيب تجي أمتس تسكن معنا ما عندي مانع
البندري: لا... حنا نسكن ببيت أمي
تركي: تبيني أسكن معتس ببيت أمتس... مستحيل
البندري معنده: طلعه من بيت أمي منيب طالعه وإذا مهوب عاجبكـ طلقني
استغرب: انهبلتي أنتي... تبيني اطلقتس بس عشان قلت لتس تسكنين معي
دمعت عيونها: ما أبي أتركـ أمي لحالها
تركي: ليه لحالها أخوانتس موجودين
نزلت دموعها: أخوي بسام دايما يسافر مع أختي عشان العلاج... وأخوي سعد زوجته دايما تبعده عنا... نادر ما يسأل عنا
نزلت راسها وبكت....
رفع راسها وهو يحس بصدق مشاعره.... قال وهو أول مرة يصدق بكلامه: لا تبكين ما يهون علي أشوف دموعتس
البندري وهي تمسح دموعها: يعني أنت موافق تسكن معي
تركي: وأختس أضايقها في بيت أمها
البندري: أنا متفقة معها أعيش هنا مع زوجي عشان أمي وهي موافقة... وش قلت
ناظرها تركي لثواني" صغيرة.. طبيعي تبي تكون قريبه من أمها" ابتسم وقال: طيب موافق وأمري لله
تذكرت البندري: صح... أنت وش أسمكـ
ضحكـ تركي: ههههههه جد ما تعرفين أسمي
حست بغبائها وضحكت: لا هههههههه... ما سألت بسام عنكـ ولا انتبهت لما وقعت العقد
تركي: أنا تركي العالي
البندري: أقول تركي
تركي: يا عيونه
استحت ونزلت راسها: عندي طلب
تركي: آمري
البندري وهي تناظر الأرض: ممكن أكمل دراستي
تركي مبسوط على براءتها: أكيد... في أي سنه أنتي
البندري: توني نجحت من ثالث متوسط وما سجلت ثانوي
تركي وكأنه يكلم طفله: ليه
البندري: سعد مهوب راضي أكمل دراستي... يقول كفاية علي متوسط... أنا أبغى أكمل دراستي ع الأقل الين آخذ الثانوية العامة
تركي: أنا زوجتس وموافق على دراستس... وأن حبيتي تكملين الجامعة ما عندي مانع... وإذا تبين أنا بنفسي أوصلتس المدرسة... في شي ثاني تبينه
البندري: تسلم... بس ممكن سؤال
تركي: قولي
البندري: ليه محدن من أهلكـ حضر
توقع تركي ها السؤال.... وأساسا هو متفق مع سعد أنه يسكت عن ها الشي.... وتركي ألف قصة مقنعه عن أهله....
تنهد تركي لأنه تذكر أهله اللي ما يدرون عنه: أنا ما عندي لا أخوان ولا أخوات... أمي سورية تزوجت أبوي وبعد ما جابتني تهاوشت معه وطلقها ومن بعدها ما شفتها... عرفت من سنين أنها ماتت... وأبوي توفى بحادث وربتني جدتي وصار لها سنة من توفت
البندري: آسفة
تركي: عادي
البندري: طيب ما عندكـ عمات أو عمان
ابتسم تركي بمرارة: محد قال إن لي عمانأو عمات... وما لي إلا زوجتي وأهلها
بعد دقايق طلع تركي وهو يحس بتأنيب الضمير.... بسبب كذبه عن موضوع أهله....

بعد ما طلعوا المعازيم جلست أم سعد مع بنتها وتسألها عن تركي.... استغربت من الكلام اللي أنقلته البندري عن أهل تركي.... بالليل خذت التلفون ودقت على بيت ولدها....
ردت الجوهرة: الوو
أم سعد: وين ولدي
الجوهرة: نايم
أم سعد: صحيه خليه يكلمني
الجوهرة: آآف... سعد أمكـ ع الخط
سعد: وما تعرفين تقولين نايم
الجوهرة: يعني ما تعرف أمكـ... خذ بس تفاهم معها
خذ سعد السماعة وقال بطفش: نعم يمه... وش عندتس متصلة الحين بنااام
أم سعد: ما تنام إلا لما تقولي وش سالفة تركي
تثاوب سعد: وش فيه
أم سعد: وش ها الخرابيط اللي قايلها لبنتي... وشو أمه سورية وما عنده أخوان هااه
سعد: يمه ترى تركي لما جا يخطب قالي أنه بيتزوج بنتس من ورا أهله
أم سعد بصدمة: وشوو
سعد: إيوه أهله ما يدرون أنه متزوج
أم سعد: وليه تزوجه أختكـ وأنت عارف أنه بيتزوجها بالسر
سعد وعارف نقطة ضعف أمه: يمه مو أنتي تبين ولد أختس... وهذا هو تزوج بنتس وبتشوفينه 24 ساعة... وعلى فكرة لو عرف أبو تركي أن ولده متزوج بنتس بيغصبه يطلقها
خافت أم سعد: ليه
سعد: يمه أبو تركي ما تزوج خالتي إلا مغصوب... وتجين أنتي وتعطين ولده بنتس والله لا يطلقها تركي... ولا نسيتي كيف منع تركي عنتس من بعد ما توفت أمه
أم سعد: لا حول ولا قوة إلا بالله
سعد: وأظن أن تركي بيتعلق فيكن لأن ما له أحد هنا... أهله ما يدرون عنه
أم سعد: هو خله يجي والله أحطه بعيوني
سعد: تبين شي يمه بنام
أم سعد: لا فمان الله

شكرا لك على الموضوع الجميل و المفيد

جزاك الله الف خير على كل ما تقدمه لهذا المنتدى

ننتظر إبداعاتك الجميلة بفارغ الصبر

كم استمتعت بردكِ الجميل

بين سحر حروفكِ التي

ليس لها مثيل

وامسك قلمي واكتب لك

انت مبدع

رووووعة
يعطيك العافية
وشكرا

أسعد الله قلوبكم وأمتعها بالخير دوماً

أسعدني كثيراً مروركم وتعطيركم هذه الصفحه

وردكم المفعم بالحب والعطاء

دمتم بخير وعافيه