رواية بقراري ضيعت نفسي و أحبابي / كاملة 2014 التالت

تذكير بمساهمة فاتح الموضوع :

دخلت مشاعل البيت.... هي عارفه أن تركي مو فيه.... عشان كذا راحت المطبخ....
مشاعل: السلام عليكم
أم سعد: وعليكم السلام... وينتس من ساعة احتريتس
مشاعل: لما اتصلتي كنت توني صاحية... ـ التفتت للبندري وقالت: وش أخبارتس مع تركي
البندري: الحمد لله... تركان طيب وأخلاقه عاليه
أم سعد: الله يسعدتس يا بنتي
مشاعل: وأنا يمه نسيتيني هههههههه
أم سعد: ربي يوفقكن إن شاء الله
البندري: يا رب... إلا قولي لي وش أخبار سعد
مشاعل: سعد!!... ـ وبحسره: سعد تطمن إن الشركة باسمه ونسانا
البندري: الله يهديه
حست بلوعة وراحت الحمام.... لحقوها أمها وأختها وهم خايفين عليها.... وبعد ما طلعت البندري شافت أمها وأختها بوجهها....
مشاعل: وش فيتس
البندري بتعب: مدري الظاهر إني مثقله بالأكل
ابتسمت مشاعل وهي تناظر أمها: يمكن يصير اللي ببالي
البندري: وشوو
أم سعد بفرح: دقي على بسام يجي ياخذنا
البندري: وين ياخذنا
طنشوها ودقوا على بسام اللي جاء وأخذهم للمستشفى.... وفعلا صارت البندري حامل....
بسام من فرحته اتصل على شقة تركي.... اللي كان جالس فيها مع صاحبه بدر....
رن التلفون وشاف تركي رقم بسام ورد: قوة بسام
بسام: الله يقويكـ... مبروكـ ألف ألف مبروكـ
تركي: الله يباركـ فيكـ... بس وش عليه
بسام: يقولون ولي العهد بالطريق
فتح تركي عيونه ع الآخر.... مر بباله أهله وبان عليه الخوف أكثر من الفرح....
بسام: تركي... تركي وين رحت
حاول تركي يكون طبيعي: هاه لا بس منيب مصدق... أنت تحكي من جد ولا تمزح
بسام: وفي أحد يمزح بها الأمور
تركي: ههههه لا تلومني من فرحتي والله
بسام: يللا مبروكـ إن شاء الله
تركي: الله يباركـ فيكـ... تامرني بشي
بسام: هههههه لا تنسى تباركـ للمدام
تركي: تحسبني احتريكـ تذكرني أنت وخشتكـ
بسام: ههههه يللا فمان الله
سكر تركي الخط وهو مصدوم.... ناظره بدر وقال: تركاان... ـ هز كتفه: هييه يا الطيب علامكـ
تركي: المدام حامل
فرح بدر: جد!! مبروووكـ والله وكبرت وبتصير أبو يبو الترووكـ
تركي: أي أبو واللي يرحم والديكـ... الحين أهلي ما يعرفون بزواجي وبعد عندي عيال
بدر: هونها تهون يا تركي... يا ما شباب تزوجوا من ورا أهلهم ولما عرفوا عنهم زعلوا كم شهر وبعدها رضوا
تركي: مدري وش أسوي... مدري متى أقول لهم عن زواجي... وأبوي وش رده
بدر: بالعكس اللي أعرفه أنكـ دلوع الماما والبابا... لا تخاف ما راح يقولون لكـ شي
تركي: أقول يا شمس القايلة أكرمني بسكوتكـ
بدر: بدر وغصبن عنكـ بدر
وقف تركي: يللا أنا طالع
بدر: وين على الله بدري
تركي: المدام حامل وتبيني أقابل خشتكـ
بدر: تركاان
تركي: سم
بدر: تظن أن بنتكـ أو ولدكـ بيجون سليمين
تفاجئ تركي: ايش؟؟
وقف بدر: تركي أنت عارف إن المدمن ما يجيب إلا معاقين
خاف تركي: فال الله ولا فالكـ
بدر: وليه خايف... هذا الصدق عيالكـ يا مشوهين أو معاقين
عصب تركي: وش دراكـ
بدر: لا تقول أمهم سليمة لأن المخدر يمشي بعروقكـ... فلا تتعلق بعيالكـ كثير
ارتفع صوت تركي: بدر علاج منيب متعالج... أنا مو غبي حتى أفضح نفسي
بدر: مو فضيحة أنكـ تتعالج الملوك أنكـ للحين مدمن
لف تركي عنه: لا صرت ولدكـ ذيكـ الساعة تعال أحكي
بدر متعود على أسلوب تركي.... قرب منه وحط يده على كتفه وقال بهدوء: زوجتكـ ما تستاهل... كفاية أخوها النذل أخذ حلالها وزوجها واحد مدمن... حرام يا تركي لا تضيع زوجتكـ وولدكـ اللي مالهم غيركـ
تركي كان بيصرخ فيه لأن البندري ما تستاهله.... بس أنه تأثر من آخر جمله قالها بدر.... تذكر لما شاف آثار الضرب بظهر البندري وقالت له أنها من سعد.... تذكر كيف تركض وراه وتحتمي به من أخوها....
تذكر ها الأشياء وهو يناظر بعيون بدر.... نزل عينه وقال: يصير خير... مع السلامة
ابتسم بدر لما شاف نظرة تركي.... بشارة خير وقال: مع السلامة
مشى تركي وكلام بدر يدور براسه" كلامكـ صحيح يا بدر.. بنوو ما تستاهل بس أهلي وش أقول لهم... يللا بيزعلون وبعدها يرضون "....
وقف سيارته عند البيت فتح درج السيارة وطلع كيس صغير.... فتحه وحط البودرة على يده.... وبعد ما أخذ الجرعة ظل بالسيارة خمس دقايق.... وبعدها نزل ودخل البيت وللصالة وشاف زوجته جالسه.... قرب منها وحط بوكيه الورد بحضنها....
تركي: ألف مبروكـ يا حياتي
البندري وهي مبتسمة: الله يباركـ فيكـ
جلس جنبها: في أي شهر أنتي
البندري: توني بالشهر الثاني
تركي: آآه منيب قادر أصبر وأناظر ولدي فيصل
البندري: ههههه فيصل... وش دراكـ يمكن تكون بنت
تركي: ياليت والله أنا أموت ع البنات... وإذا جت لي بنت يا رب تطلع قمر مثل أمها
البندري: أنت تبي بنت ولا ولد
تركي: مو مهم البنت أو الولد المهم صحتس أنتي
البندري: تسلم لي يا تركي

بعد شهر....
دخل تركي البيت مستعجل وجسمه يرتجف وراسه يألمه، محتاج جرعه.... تذكر أنه مخبي جرعة احتياطيه بالغرفة.... على طول راح فوق ودخل الغرفة.... فتح الكبت وبدا يدور بسرعة.... شافها وأخذها، يده ترتجف وهو يحط البودرة بيده الثانية.... قرب أنفه وشم البودرة، ثواني ورجع طبيعي.... دخل الحمام وغسل وجهه وجلس على طرف السرير بتعب.... التفت لما فتح الباب وشاف البندري....
البندري كانت بالمطبخ، سمعت صوت الباب يسكر وعرفت أنه تركي.... بس استغربت العادة يجي لها قبل ما يروح فوق.... طلعت للصالة وشافته راح فوق.... نادته وما رد عليها واستغربت" تركي مو طبيعي اليوم ".... راحت وراه وشافته يجلس على طرف السرير....
قربت منه وقالت: تركان وش فيكـ
تركي: تعباان حدي
البندري: قم للطبيب
ابتسم وهو يتمدد: الطبيب هه لا بنام شوي
البندري: طيب غير ملابسكـ
تركي بدا يستسلم للنوم: بعد..دين
استغربت البندري أول مرة تشوفه على ها الحال.... حطت يدها على جبهته تتأكد من حرارته.... بس كانت عاديه وما فيها شي.... فصخته جزمته وحطت عليه الغطا وشغلت الاباجورة وطلعت....

صحى تركي لما سمع البندري تناديه....
البندري: قم يا تركي... يكفي نوم
تركي: كم الساعة
جلست البندري بطرف السرير: 6 المغرب
سحب تركي نفسه: يا الله ليه تركتيني نايم كل ذا الوقت
البندري: كنت تعبان مرة... حاولت أصحيكـ بس أنت ما تدري عني
تذكر تركي السبب وسكت....
البندري لما شافته سكت خافت ومسكت يده وقالت: تركي أنت أحسن الحين
ابتسم تركي" آآه لو تعرفين يا بنوو": إيوه الحمد لله ... ـ بعد الغطا عنه: بروح أتروش جهزي لي ملابسي
وقفت البندري: طيب
بعد ما تروش ولبس استقبل القبلة وبدا يصلي الصلوات اللي فاتته.... ولما خلص التفت عليها وهو جالس بالأرض.... شافها واقفة عند الكومدينة وتحركـ شي بيدها.... التفتت البندري وشافته يناظرها وهو سرحان....
البندري: خلصت
انتبه تركي ووقف: إيوه
البندري: تقبل الله
تركي وهو يرتب السجادة: منا ومنتس
البندري: تركاان تعال خلني أبخركـ
تقدم تركي وهو مبتسم: وش المناسبة
البندري تطبق درس أختها.... ابتسمت وقالت: كذا بدون مناسبة
سكت تركي دقايق ولما شافها حطت المبخرة مسكـ يدها وهو ناوي ينفذ القرار اللي فكر فيه من زمان....
ابتسمت البندري بخجل درس أختها جاب نتيجة....
تركي: بندري
البندري: سم
تركي: سم الله عدوتس... بس أبغى أقولتس عن حاجة
البندري: وش هي
تركي: أنا بسافر
ما تفاجـأت البندري لأنه دايما يسافر للعمل.... هو اللي قالها كذا ولا أساسا هو يسافر عشان يزور أهله....
البندري: طيب تبي أجهز لكـ ملابسكـ
تركي: إيوه بس مو اليوم... واحتمال أتأخر ها المرة
البندري: لكم يوم
تركي: شهرين أو ثلاثة
فتحت البندري عيونها: ايش؟؟
تركي مصمم يتعالج من المخدرات.... عشانها وعشان ولده اللي ما جا للدنيا.... ما تستاهل العايلة الصغيرة اللي كونها أنه يكون مدمن.... وما يبي البندري تكتشف سوابقه ويطيح من عينها....
تركي: هذا عشانتس يا بنوو
دمعت عيون البندري: بتتركني ثلاثة أشهر وتقول عشاني
تركي: لا تخافين منيب مسافر وأتركتس لحالتس... منيب مسافر وأخوانتس مسافرين... ما أبيتس تحتاجين لحد بوجودي... بس ضروري أسافر
بعدت عنه وجلست بطرف السرير وبكت.... تنهد تركي وراح يكلمها....

وقف تركي عند باب المستشفى وتنهد.... فكر يتراجع بس تذكر البندري ودخل.... جلس قبال مكتب الدكتور وهو ساكت....
الدكتور: وأخيرا أررت تتعالج يا توركي
تركي: إيوه
وقف الدكتور وقال: ماشي أتفزل معايا

رفعت البندري السماعة ودقت ع الرقم وهي مترددة.... سمعت صوت رجال وارتبكت....
بدر: الوو
البندري: مـ.ممكن أكلم تركي
بدر عرف أنها زوجته: والله يا أختي تركي بالعمل
البندري: وليه ما يتصل علي
توهق بدر: هااه
البندري شوي وتصيح: ليه ما يتصل علي... صار له أكثر من 3 أسابيع مسافر وما أعرف عنه حاجة
بدر: لا تخافين عليه هو بخير
البندري: من قالكـ
بدر بتردد: هو ييـ..ـتصل علي
تفاجات البندري: جد!!
بدر: لا... مو دايما بس مرة اتصل وما عاد سمعت صوته... بس لا تخافين إذا اتصل بقوله يكلمتس
البندري حست أنها زودتها: مشكور... فمان الله
سكرت الخط ورجعت للتلفزيون وهي مقهورة من تركي....

أما بدر كان يفكر بتركي.... فقرر أنه يزوره، انبسط تركي بزيارة بدر....
بدر: وش مسوي يا تركي
تركي يصارع الألم اللي ياكل جسمه: آآه يا بدر... تعباان وجسمي يالمني وما أنام إلا متأخر بسبب الصداع... ابغي جرعه وحده ما ابغي غيرها بس من يسمعكـ غير الجدار
بدر: هانت يا تركي... شدة وتعدي وبعدين هذا كله لمصلحتكـ... وعشان زوجتكـ وولدكـ
تركي: إيه والله عشان زوجتي أنا صابر على كل شي... تصدق على ها التعب اللي أحس فيه جوعااان حدي جوعان كأني عايش في مجاعة
استغرب بدر: ليه جوعان ما يعطونكم أكل
تركي: وأنت ما قد شفت أكل المستشفى... بارد وقليل ويسد النفس
بدر: تحمل يا تركي ما بقى إلا الهين... أنت بس أطلع من المستشفى ولكـ طبخات تاكل أصابعكـ وراها
تركي: ما تقصر يا بدر
بدر: على فكرة زوجتكـ اتصلت من شوي
تركي: وش فيها
بدر: ما فيها إلا كل خير... بس تسأل عنكـ
تركي: يا حياتي يا بنوو
بدر يستهبل: أسمها بنوو
عصب تركي: كل تبن
بدر: ههههههههه فهمنا... بس واللي يعافيكـ اتصل عليها حرام اللي تسويه فيها... ع الأقل لو عارفه أنكـ تتعالج كان عذرتكـ... بس أنت مسافر على أساس العمل... كيف ما تتصل عليها
تركي: يصير خير
ناظر تركي بدر وهو يطلع بعد ما انتهت الزيارة.... خنقته العبرة لأنه مشتاق للعالم برة ويحس أنه عايش بسجن مو مستشفى....

مشاعل: الحمد لله على كل حال... هذا نصيبي وأنا راضيه فيه
البندري كانت جالسه مع صديقات أختها....كلهم يحكون ويضحكون سوا وهي تفكر باللي مسافر وتنتظر اتصاله....
نهاد: بنوو... يا بنوو
انتبه البندري: هلا تحاكيني
هيلة: لا بنوو مو معنا
الكل: ههههههههه
نهاد: أقول وش مسويه مع الحمل
البندري: تعب والله... أحسد مشاعل لأنها مرتاحة
ابتسمت مشاعل" اشتري ها التعب يا بنوو بس عشان زوجي ": لا تخافين يا بنوو... أنتي بس جيبي العيال وأنا وأمي نقوم فيهم
البندري: هههه إن شاء الله تذوقين اللي أذوقه
رن التلفون النقال وردت البندري: الوو
ـ : هلا بها الصوت... هلا بحياتي والله
غرقت عيونها لما سمعت صوته.... وقفت وطلعت وهي حاطه يدها بفمها تكتم شهقتها.... البنات عرفوا أنه زوجها ورجعوا يكملون سوالفهم....
بالصالة....
البندري تبكي وهي تسمع صوته لأنها اشتاقت له....
تركي ندم أنه تركها شهر بدون ما يكلمها.... فقال: بنوو خلاص لا تبكين عورتي قلبي
البندري تبكي....
تركي: بنوو ما أقدر أطول معتس... أمسحي دموعتس لا تبكين
البندري بصوت باكي: وينكـ يا تركي... ليه ما تتصل فيني أنت ما تبيني صح
تركي: افاا يا بنوو أنا ما أبيتس... لا عاد أسمع ها الحكي مرة ثانية... طمنيني عليتس وش أخبارتس
البندري: أنا طيبة وأنت وش مسوي
تركي: آآه يا بنوو تعبان... ومنهد حيلي قليل آكل وقليل أنام... بس عشانتس كل شي يهون
البندري: لو عارفة كان جيت معكـ غصبن عنكـ
تركي: وين تجين... أنا اللي متعبني أنتس بعيده عني
البندري: يا بعد عمري تركان
تركي: آآه على تركان هذي... ما عرفت أن أسمي حلو إلا لما عرفتس
انبسطت البندري: هههههههه... عارفة كل شي مني حلو
ظلوا يحكون 5 دقايق وانتبه تركي على يد ترتبت على كتفه.... التفت وشاف الدكتور يعني لازم يسكر....
تركي: طيب ثواني بس... بنوو أنا بسكر الحين
البندري: ليه تسكر... تونا
تركي: إيوه بس أنا ما أقدر أطول معتس... عندي شغل كثير
البندري: لا بدري... متى تتصل مرة ثانيه
تركي: مدري على حسب... بس انتبهي لحالتس وع النونو
وبعد محاولات سكرت البندري وظلت بالصالة.... تفكر في تركي ومبسوطة باتصاله.... رجعت عند صديقات أختها وتغيرت نفسيتها بسرعة....

هجم ع الأكل بشراهة.... مشفوح ع الأكل لأنه من ثلاثة أشهر محروم من الطبخات اللي قبالة.... أما صديقه كان يناظره وهو مبسوط له.... لأنه تعالج ورجع مثل ما كان....
ناظر تركي الأطباق وضحكـ: هههههههههههه
بدر: وش فيكـ
تركي: السموحة يا بدر ما خليت لكـ شي
بدر: ما عليكـ مني خذ راحتكـ
تركي: مدري وش فيني أكلت ها الكثر
بدر: بالعافية
تركي: الله يعافيكـ... منيب مصدق إني تعالجت من ها السم... مو مصدق إني ما بحتاج للمخدر وغيره
بدر: أهم شي أنكـ ما ترجع لذاكـ الطريق
تركي: لااا الله لا يعودها من أيام... ـ وقف: عموما أنا بغسل يدي وبمشي
بدر: بدري
تركي وهو يمشي: بدري من عمركـ... بروح لزوجتي مشتــااااق لها
بدر: هي تدري أنكـ بترجع اليوم
وقف تركي عند المغسلة: لا طبعا
بدر: وأهلكـ يدرون أنكـ تعالجت
تنرفز تركي وهو يغسل يده: لا ما يدرون ومو لازم يدرون
بدر: حرام يا تركي... أكيد أنهم يتمنون أنكـ تتعالج ليه ما تفرحهم
عصب تركي وهو يجفف يدينه: لأني ما أهمهم ولا هم يهموني... عندي وحده تغنيني عنهم كلهم
بدر: بس....
قاطعه تركي: الله يخليكـ لا تفتح معي ذا الموضوع مرة ثانية... لا تخرب علي فرحتي
ابتسم بدر لأن تركي مبسوط أنه تعالج: طيب على راحتكـ
شال تركي الشنطة وقال: يللا أنا ماشي الحين... تبي شي
بدر: سلامتكـ
تركي: تسلم... لا تنسى تشكر الوالدة... فمان الله

وقف تركي وناظر البيت وابتسم.... ثلاثة أشهر مرت عليه وكأنها ثلاث سنين.... بس أنه رجع نظيف من الحياة اللي كان عايش فيها.... سليم من كل السموم اللي كان ياخذها.... وكل هذا عشان هي وبس....
دخل البيت وللصالة الفاضية.... انتبه على يد البندري اللي متمددة ع الكنب.... حط الشنطة وقرب وشاف كتاب البلاغة بالأرض.... ناظرها وهي غرقانه بالنوم وما تدري باللي حولها....
باس جبهتها وجلس ع الطاولة قبالها.... تأملها وعلى وجهه أكبر ابتسامة.... البندري سمنانه بسبب الحمل وبطنها بارز شوي.... حست بأنفاس تشاركها الهواء وفتحت عيونها.... شافت تركي اللي زادت ابتسامته لما صحت....
البندري: تركي
تركي: عيون تركي
استوعبت البندري وضمته: تركي... متى جيت
ضحكـ تركي: ههههه اليوم وصلت
بعدت عنه وهي تمسح دموعها....
شافها تركي تمسح دموعها وقال: افاا ليه ها الدموع تبيني أسافر
جلست البندري ع الكنب: لااا ايش تسافر هذي... أنا ما صدقت شفتكـ
تركي: آآه وأنا أعد الأيام عشان أشوفتس... كيف حالتس يا بنوو
البندري: الحمد لله... وش فيكـ نحفت كثير
تركي: أنتي مو معي كيف ما أكون ضعفان
البندري: يا بعد عمري تروكي... الحين أسوي لكـ شي تاكله
توها بتوقف مسكها تركي: أجلسي أكلت من شوي مع خويي... ـ حط يده على بطنها وقال: وكيف حال النونو
ابتسمت البندري وهي تناظر بطنها: بخير بس مشتاق لأبوه
تركي: وأنا مشتاق له وأنتظر يجي اليوم اللي أشيله
البندري: إن شاء الله نبلغ فيه
تركي: إن شاء الله... بندري إذا فيتس النوم ليه نايمه هنا
البندري: نروح فوق
تركي: إيوه أنا تعبان ومنهد حيلي
وقفت البندري: يللا
راحت معه فوق وبس حط تركي راسه ع المخدة استسلم للنوم.... خاب أمل البندري لأنها مشتاقة له وتبي تسولف له.... بس عذرته لأنه توه جاي من السفر وتعبان.... ابتسمت وهي تناظره، أهم شي أنه رجع وبكرة تسولف معه....
.
.

شكرا لك على الموضوع الجميل و المفيد

جزاك الله الف خير على كل ما تقدمه لهذا المنتدى

ننتظر إبداعاتك الجميلة بفارغ الصبر

كم استمتعت بردكِ الجميل

بين سحر حروفكِ التي

ليس لها مثيل

وامسك قلمي واكتب لك

انت مبدع

رووووعة
يعطيك العافية
وشكرا

أسعد الله قلوبكم وأمتعها بالخير دوماً

أسعدني كثيراً مروركم وتعطيركم هذه الصفحه

وردكم المفعم بالحب والعطاء

دمتم بخير وعافيه