تذكير بمساهمة فاتح الموضوع :بقراري ضيعت نفسي وأحبابي..
بعد كم شهر....
نزل وهو تعبـــــااان ونعســـــااااان.... عصبت لما شافته يتثاوب....
البندري بعصبية: ساعة احتريكـ
تركي وهو يفركـ عيونه: حرام عليتس باقي ساعتين على دوامي ليه تصحيني بدري
البندري: لما قلت لكـ أمس الساعة 11 قم نام قلت بدري
جلس تركي: ما اختلفنا، بس والله حرام... توني من ساعتين صاحي لصلاة الفجر... والحين لمدرستس وبعد ساعتين للعمل... ليه ما رحتي مع بسام
البندري: تستهبل أنت... ولا نسيت أن أخواني مسافرين... يللا قم صارت الساعة 6 وما رحت المدرسة
كتف تركي أيدينه وقال: جالسه تهاوشني وتصرخ علي كأني سواقها منيب زوجها
ابتسمت البندري: بعد أنت عارف كله من ولدكـ اللي ما يخليني أنام
وقف تركي: ما يخليكـ تنامين هااه... قدامي بس
طلعوا ولما وصلوا لباب المدرسة شهقت البندري: يا ربيييي
تركي: وش فيتس
البندري: نسيت فلوسي بالبيت
ابتسم تركي وفتح بوكه وطلع ريالين وقال: هذي ريالين... واحد فطيرة بالجبن والثاني عصير برتقال
فتحت البندري عيونها ع الآخر: وش ذا!! ريالين!!... اشتري فيهم باونتي يا بخييل
ضحكـ تركي: هههههههه أخاف أعطيتس أكثر وتشترين الباونتي وتنسين البيبي اللي ياكل معتس
البندري: عن ها الحكي الفاضي وترا هذي طلبات ولدكـ مو أنا
تركي: أنا أشكـ أنها طلبات ولدي... ـ مد لها البوكـ: بس تفضلي
ناظرت البندري البوكـ وسحبت 200 ريال وفتحت الباب ونزلت.... رفعت الميتين وقالت: هذول بدل الريالين يا بخيل
ضحكـ تركي على حركتها.... وقال: ههههههه حلالتس
البندري: اوكي باي... ـ مشت قبل ما تسمع رده....
مشى وهو يفكر فيها، ما تزوجها إلا شفقة.... والحين يحبها ومو قادر يفارقها.... يضيق صدره لما يتذكر أهله، وأنهم ما يدرون بوجودها بحياته.... ومستغربين أنه فجأة تعالج....
بالفسحة جو صديقات البندري وجلسوا معها....
دلال: يا لطيف من ذا الدووبه
البندري: أنا دووبه يا دلول
دلال: هههههه قصدي لطووف
لطيفة تقلدها: قصدي لطووف... ناظري جسمكـ بالأول وبعدها أحكي... ـ والتفتت للبندري: أقول بنوو متى بيشرف البيبي
البندري: بعد شهرين
لطيفة: بنات أنا جوعانه وبنزل اشتري تبون شي
مدت البندري فلوسها: خذي هاتي عصير وفلافل وباونتي
دلال: ولازم ذا الباونتي... آآخ لو يدري عنتس أبو الشباب كان ما عطاتس دراهم
ضحكت البندري: ههههههههه تو الصباح عطاني ريالين يقول للعصير والثاني للفطيرة
لطيفة: ياااه زوجكـ بخيل... حتى ابتدائي يعطونهم أهل أكثر من 5 ريال
البندري: يا خبله ذول 100 مهيب 5... أقول روحي اشتري لي أنا جوعانه... وتروكي موصيني ما أجوع
لطيفة: هههه... اوكي بااي
طلعت لطيفة....
التفتت دلال للبندري: أقول بنووو ما تلاحظين أنتس صغيرة ع الزواج... يعني الحين عمرتس 15 سنة
قاطعتها البندري: بعد شهر يصير عمري 16 سنة
دلال: يعني كبرتي... الحين أنتي تدرسين ومتزوجة وحامل... لا بالله ضاع شبابتس
ناظرت البندري دبتها: احيانا الظروف هي اللي تحكم... يعني أنا بعدي صغيرة وش لي بالزواج والمسؤليه... ما في سبب غير ظروفي يا دلال
دلال: آآسفه بنوو مهوب قصدي أحرجتس
البندري: عادي
دلال: وأنتي مبسوطة مع تركي
البندري: أكيد مبسوطة... بمثل ذا الوقت لما يكون بسام ومشاعل مسافرين... كنت أخاف يجي سعد يذبحني... بس بوجود تركي كل شي انتهى... ما عاد في هموم وخوف لأني أحس بالأمان مع تركي... تكفيني دخلته علي البيت لأنه الوحيد اللي قدر يوقف بوجه سعد
دلال: أسمحي لي لو أنتس متنازلة عن الشركة كان ارتحتي بدون زواج
البندري: صح كلامتس... بس أفرضي إني ما تزوجت وأخواني مسافرين... واحتجت حاجة وش أسوي
دلال: اتصلي عليه
البندري: اتصل عليه؟؟ حسرة علي... هو الحين تطمن أن الشركة صار له وانقطعت أخباره... تعرفين وش كان بيسوي
دلال: وش بيسوي
البندري: بيقول أنتي لازم تسكنين معي... مهيب بعدله أنتس وأمي لحالكن بالبيت
دلال: وأمتس
البندري: يا حياتي يا أمي ما بيدها شي... وسعد بيسكني معه حتى أكون خدامه لزوجته
دلال: يعني تنصحيني أتزوج
البندري: اللي عايشه بمثل ظروفي تتزوج بدون تردد
لطيفة من ورا البندري: بوووووو
خافت البندري: بسم الله متى جيتي
دلال: لطووف بلا هبال بنوو حامل مو كويس لها
لطيفة: هههههههههه تستاهلي يا بنووو مو هذي حركاتكـ
دلال: أنا مدري كيف المديرة قبلت بطالبات معهن ارتجاجات بالمخ
لطيفة: ارتجاج بعينكـ... ـ ناظرت البندري: تنصحيني بالزواج يا بنوو... طيب بقول لولد عمي يعجل بزواجنا
دلال: إيوه تكفين عشان تعقلين ويروح عنتس الهبال ههههههههه
البندري: ههههههه تسوين خير والله
لطيفة: عناد فيكم منيب متزوجة إلا بعد ما أتخرج من الجامعة ههههههه
بعد المدرسة جا تركي وأخذ البندري وراحوا البيت.... ومن التعب ناموا وما صحوا إلا الساعة 4 العصر....
تركي: بنوو أنا جوعان
البندري: حتى أنا جوعانه... أطلب لي من برجر كنغ
تركي: ليه مطعم منتي طابخه اليوم
البندري: لا شنوو أطبخ حرام عليكـ أنا لما أشتغل أكون شايله معي وزن زيادة
حط تركي يده على بطنها وقال: ما أحس أنه ثقيل
ناظرته البندري باستهزاء: بالله... أقول لا يكثر
ضحكـ تركي: هههههه طيب باتصل عليهم
توه مسكـ السماعة إلا طلعت أم سعد من غرفتها....
أم سعد: وأخيرا صحيتوا من الظهر وأنا أتصل فوق ومحدن يرد
تركي: راحت علينا نومه يا خاله وش نسوي
أم سعد: عاد أنا اتصلت عليكم عشان تنزلون للغدا بس محدن رد وهذا أنا مجهزته بالمطبخ
تركي: ليه مكلفه على نفستس يا خاله توني باتصل ع المطعم نطلب غدا
أم سعد: وش هو له المطاعم... مرتكـ حامل وتأكلها من مطاعم
قام تركي وحب راسها: لا والله ما تزعلين يا خاله... بس أنا ما أبي أتعب بنوو ولا أبغى أكلف عليتس
أم سعد: ما فيها تعب ولا كلفه... ولما يجي بسام ومشاعل يحلها الحلال
بعد كم يوم.... دخل تركي وشاف البندري جالسه بالصالة....
تركي: مساء الخير
البندري: مساء النور
تركي: كيف حالتس وكيف حال ولدنا
البندري: أنا طيبه... ـ وتناظر بطنها: وولدكـ مو مخليني بحالي... كل شوي يضربني
قرب تركي بسرعة وحط أذنه عند بطنها: ما أسمع حاجة
البندري: ههههه ولا راح تسمع لأنه سكت
جلس تركي جنبها وتنهد....
البندري: خير وش فيكـ
تركي: جا في بالي بسام الله يعطيه إن شاء الله
البندري: إن شاء الله... ما تتصور وش قد فرح هو ومشاعل لما عرفوا إني حامل... ومدري وش بيسوون لما يعرفون إن فيني ولد
تركي: بخليهم يربونه وأنا وأنتي نتأمر عليهم
البندري: هههههههههههه
تركي: ما قلتي لي وين أمتس
البندري: راحت لعند جارتها
دخل بسام ومشاعل من بعد ما فتحت الخدامة الباب....: السلام عليكم
تركي والبندري: وعليكم السلام... الحمد لله ع السلامة
بسام: الله يسلمكم... وش أخبار العصفور
البندري: العصفور بخير ويسلم عليكـ
بسام: سمعوا بما أنكم مو وجه زواج أنا باخذه عندي
تركي: ههههههه متى ما بغيته خذه حنا موافقين
البندري: تو تركي يقول بيخليكم تربونه وأنا وياه نتأمر عليكم
مشاعل: لا بالله ما عاد نبيه
الكل ضحكـ.... وخصوصا تركي لأنه فاقد الجو الأسري من صغره....
بعد شهرين
تركي كان بالدمام عند أهله.... كان جالس مع زوجة أبوه اللي لاحظت أنه مرتاح.... كان يسولف ويضحكـ وزيادة على كذا سمنان.... ما تدري وش السر اللي مخبيه تركي عنهم.... بس كانت مبسوطة له لأنها كانت سبب تعاسته وهو صغير....
بعد ما خلص تركي سوالفه راح غرفته ورن التلفون.... قفل الباب وراح يرد....
تركي: الوو
بسام: هلا تركي
تركي: هلا فيكـ
بسام: كيف حالكـ
تركي: بخير كيف حال بنووو
بسام: وأنا مالي رب تسأل عني
تركي: وش ابغي فيكـ أنت وخشتكـ
بسام: ههههه
تركي: وش أخبارها عساها بخير
بسام: لا والله بنوو بالمستشفى
تركي: وش فيها
بسام: أبشركـ جابت لكـ فيصل
فرح تركي: جد!!
بسام: إيوه مبروكـ يبو فيصل والله يبلغكـ فيه
تركي: الله يباركـ فيكـ... وإن شاء الله أبلغ فيه بوجودكـ
بسام: تسلم... هاه وش صار على شغلكـ بالشرقية
تنهد تركي لأن ما عنده شغل غير أنه يزور أهله.... أو بالأخص زوجة أبوه وأخته لأن علاقته بأبوه وإخوانه شبه مقطوعة....
تركي: تعبت والله... بس التعب راح من سمعت الخبر
بسام: ومتى ناوي تجي الرياض
تركي: الجمعة إن شاء الله
بسام: على خير إن شاء الله... يللا بروح أشوف الصغير
تركي: تكفى بوسه عني
بسام: أكيد ببوسه بس مو عشانكـ هههههه
تركي: بردها لكـ... يللا حط بالكـ عليه
بسام: أوكي فمان الله
سكر تركي الخط وهو مبسوط.... طلع من غرفته وشاف أخوه الصغير ماهر جالس بالأرض ويحط ألعابه بفمه.... اختفت ابتسامته لأن تذكر أمه.... تقدم وجلس على ركبه قبال أخوه....
نزلت مها أخته المجلة لما حست بحد.... ناظرت بتركي اللي جلس قبال ماهر ويناظره بسرحان.... فتحت عيونها ع الآخر لما سمعت تركي يتكلم....
تركي اللي تذكر أمه وش بتكون فرحتها لما تعرف أن ولدها صار أب.... مسح شعر أخوه وقال: يمه ما ولهتي علي... بس أنا مشتاق لتس وتمنيتس تكونين معي بها اليوم... فرحتي ناقصة بدونتس يمه، يا ليتني مت معتس ياليت
نزلت دمعت مها لما سمعت أخوها.... تركي اللي طول عمره طايش وما يهتم لأحد.... عرفت أنه يحس ويتأثر بكلام اللي حوله بس يبين العكس.... توقعت أنه يتأثر شوي بس مو لدرجة أنه يتمنى الموت.... ما عرفت وش اللي ذكره بأمه.... بس اللي فهمته من كلامه أنه صار له شي حلو ووده تكون أمه موجودة وتشاركه بفرحته.... توها بتسأله بس كلمت أبوها الجمتها....
أبو تركي: صادق يا تركي... يا ليتكـ ميت معها كان ريحتني منكـ ومن بلاويكـ
أبو تركي اللي سمع كلام ولده أنقهر.... ما يدري وش اللي قصر فيه على ولده وخلاه يتمنى الموت.... أملاكـ أمه عنده ومعطيه الحرية.... ومع ذلكـ حريته ضيعته.... فرح لما تعالج بس فرحته نقصت لما شاف تركي رجع ساكت عن حقه.... حاول يغير أسلوبه مع تركي بس صار يشوف تركي ضعيف شخصية مثل أمه.... عشان كذا صار يعامله بقسوة يمكن يتعلم تركي ياخذ حقه.... وما يدري أنه يطعن تركي بقسوته....
تركي ما تحركـ ولا التفت بس شد قبضة يده.... وبداخله يستغفر حتى ما يغلط على أبوه.... وقف وتو ينتبه بوجود أخته وعلى قد ما يقدر أرخى ملامحه.... التفت لأبوه وناظره ببرود....
أبو تركي يكره ها النظرة: وش فيكـ ساكت نفسي بيوم أسمعكـ ترد علي... نفسي أشوفكـ مثل أخوكـ أسد والكل يهابكـ... بس ما منكـ رجا لأنكـ طالع على أمكـ
تغيرت ملامح تركي لقهر" لو تدري إن أمي موصيتني ما يطلع صوتي بوجودكـ.. بس آآخ على من ينتظر رضاكـ "....
زفر بتعب ما يقدر يرد على أبوه اللي يكمل كلامه.... ختم أبو تركي كلامه وهو يحسب ويدعي.... مشى تركي لغرفته بدون ما يرد على أخته اللي تناديه.... شال شنطته ونزل تحت" أنا وش اللي خلاني أزورهم "....
شافته زوجة أبوه وقالت: تركي وين رايح
ناظرها تركي" سامحيني يا مرت أبوي.. مقدر أنسى عمايلتس فيني "....
زوجة أبوه: تركي وين رايح... مو أنت قايل أنكـ مشتهي سمكـ وأنا سويته عشانكـ
تركي شوي وتنزل دموعه.... قال وهو رايح: متضايق، أبي أمي... ما عليكم مني، أنسوني، أنا مو ولدكم
ما يدري وش يقول بس المهم أنه يهرب من المكان.... طلع من البيت وقرر أنه يرجع للرياض بدل الهم اللي بالدمام.... بس بآخر لحظة غير رايه وراح لبيت أمه.... أعصابه تلفانه وخاف تترمل البندري ويتيتم ولده وهو ما شافه....
بعد مرور أربع سنوات....
البندري كانت نايمه وشافت نفسها تمشي بالظلام.... وسمعت صوت تركي وراحت له.... خافت لما شافته يبكي وقالت: تركي وش فيكـ
تركي بصوت باكي: غصبن عني يا بندري... والله إني أحبتس بس ظروفي أقوى مني
البندري: أي ظروف وش فيكـ
تركي وهو يبعد: غصبن عني يا بندري... والله إني أحبتس بس ظروفي أقوى مني
حاولت البندري تلحقه: لحظه يا تركي فهمني وش فيكـ
ابتعد تركي وهو يعيد كلامه وهي تناديه وتحاول تلحقه الين اختفى.... سمعت صوت ولدها يضحكـ والتفتت وشافت مشاعل وبسام....
البندري: مشاعل وين فتووني
مشاعل وهي تلعب فيصل: فتوون عند أبوها وحنا عندنا فصولي
بسام كان معصب: أنا كنت حاس من قبل بس محد سمعني
خافت البندري: وش حسيت به... وش اللي صار
بسام: محد بيدفع الثمن غير فيصل وفاتن
صحت البندري من النوم وهي متروعه.... خافت من ها الحلم اللي يهدد بيتها.... تعوذت من إبليس وهي تتنفس بسرعة.... ناظرت تركي اللي كان نايم" وش اللي مخبيه يا تركي وتبكي عشانه.. أعوذوا بالله من الشيطان الرجيم.. أكيد هذي كوابيس ".... قامت وطلت على عيالهم النايمين باستهم ورجعت لسرير وهي تفكر بالحلم....
كالعادة آخر الأسبوع، وصل تركي من الدمام ودخل البيت.... كانت مشاعل موجودة مع أمها وأختها بالصالة ومع عيال البندري....
دخل تركي: السلام عليكم
الكل: وعليكم السلام
ركض فيصل ( 3 سنوات ) لأبوه.... اللي ضمه وباسه....
تركي: هلا بحبيبي فصولي... شلونكـ
فيصل: تيب... بابا أبي
ا
تركي: أبشر بشتري لكـ اللي تبيه... بس أنام شوي
راح تركي فوق وراحت وراه زوجته.... فضخ تركي ثوبه وجلس ع السرير والبندري تطلع أغراض من شنطته....
البندري وهي تطلع أغراضه: تركي... ما تلاحظ إن أغلب أشغالكـ ما تكون إلا بالشرقية
ناظرها تركي وهو مستغرب من كلامها....
البندري تكمل كلامها وما تدري عنه: يعني أنت دايما تسافر للمنطقة الشمالية أو جده بس أكثر وحده الشرقية وشهريا
تركي ويبي يعرف وش تبي توصل له.... قال بشوية حده: وش تبيني أسوي
استغربت البندري من نبرة صوته: تصدق في حياتي كلها ما قد شفت البحر... وأنت شهريا تروح الدمام وما قد فكرت تاخذنا معكـ
تنزفر تركي: وأنا أروح عشان أتمشى... ـ تمدد وقال: أسمعي أنا بنام صحيني لصلاة العصر
طلعت البندري وتأكدت من شكوكـ أختها.... في سر مخبيه تركي ورا سفره غير الشغل.... بتسكت الحين وبتحقق معه وقت ثاني....
تركي لما سمع الباب سكر بدا يفكر" لاحظت يا تركي.. وليه ما تلاحظ مو هي زوجتكـ اللي ما يدرون أهلكـ عنها.. وإذا دروا وش بيصير.. أبوي طول عمره حاقد علي جت على زواجي يعني.. بس البندري وأهلها وش بيسوون إذا عرفوا بموضوع أهلي.. بتكرهي وتطلب الطلاق وبتاخذ العيال.. ولا بتسكت وتنتظر المجهول مثلي "....
دخلت البندري وهي شايله بنتها وشافت تركي سرحان.... خافت أكيد شكـ أختها بمحله.... وملاحظتها طيرت النوم من عيونه وخلته يفكر....
قالت تنبهه: تركي وش فيك ما نمت... باقي ساعة ع الصلاة
استغرب تركي كيف مر الوقت بسرعة" هذي من متى هنا ": ما جاني نوم... وين فيصل
البندري: خذته مشاعل معها
عدل تركي جلسته وقال: بندري... تعالي أجلسي جنبي
جلست بعد ما حطت بنتها بسريرها اللي كله العاب.... وقالت: وش فيكـ
تركي: بندري في شي من تزوجتس وأنا ساكت عنه... والحين أبغى أقولتس إياه بس حطي في بالتس إني أحبتس ومالي غناة عنتس
انقبض قلب البندري: خير وش فيكـ
نزل تركي عينه وقال: سمعيني ولا تقاطعيني... أنا قلت لتس من قبل إني من الدمام مو من الرياض... أبوي عنده شركة كبيرة وأسمه كبير بالسوق... بس أنا حبيت أعتمد على نفسي واشتغلت هنا بعيد عن واسطات الوالد
البندري مفجوعه: وش ها الحكي أبوكـ حي
تركي: لا تقاطعيني... الحمد لله اشتغلت هنا وتيسرت أموري وأمي كانت....
قاطعته البندري: وأمكـ موجودة بعد... ـ شافت نظرته وسكتت....
تركي: وأمي كانت تبي تزوجني بس أنا ما أبغى أتزوج إلا بأختياري... وبعد ما شفتس وسألت عنتس... خطبتس بعد ما عرفت ظروفتس
كانت تسمعه ودموعها تنزل، طلع لتركي أهل أكبر كذبه بحياتها.... وقفت وهي تحس بكره له، راحت لسرير بنتها.... فاتن شافت أمها واقفة قبالها مدت يدينها لها عشان تشيلها.... ناظرت بنتها ودمعتها بخدها.... تتنفس بسرعة ومهيب مصدقة اللي تسمعه....
تركي يناظر ظهرها وقال: عندي أخوان، أخوي الكبير يوسف... وأخوي الثاني خالد... وأختي الوحيدة مها وأخوي الصغير ماهر... ما بينه وبين فيصل إلا كم شهر
التفتت البندري وهي تبكي: صار عندنا عيال يا تركي وتوكـ تتكلم عن أهلكـ
تركي بتردد: لأني... لأني تزوجتس من وراهم
غطت البندري وجهها بيديها وبكت بصوت مسموع.... قرب تركي وحط يده على كتفها.... بعدت البندري عنه وقالت: لا تلمسني ابعد عني
تركي: والله مو قصدي أتسلى فيتس
البندري منهارة: من ورا أهلكـ!!... ليه وأنا وش ناقصني حتى تتزوجني من ورا أهلكـ
تركي: مو ناقصتس شي... بس ظلم أخوتس لتس هو اللي خلاني أخطبتس
انقهرت البندري متزوجها شفقة: حياتي مع سعد أرحم من اللي سويته فيني
تركي: بندري أهدي شوي... وأنا بكلم أهلي عنتس الأسبوع الجاي
البندري: تستهبل أنت... بعد أربع سنوات بتقول أنا متزوج بنت فقر ومالها ظهر
سكت تركي وما عرف يرد....
البندري: أعرف أنكـ هدمت حياتي... أنت بالآخر بتتزوج البنت اللي بتشرف أهلكـ... بس تذكر إني أنا وعيالكـ بندفع ثمن طيشكـ يا تركي... خسارة على قلبي اللي عطيتكـ إياه خسارة
تركي ما عنده جواب مناسب لبس ثوبه.... وطلع من الغرفة ومن البيت كله.... البندري بكت بحسرة ما توقعت ها الشي منه.... شالت بنتها ونزلت تحت لغرفة أمها.... حطت بنتها وضمت أمها وبكت....
سألتها أمها عن السبب وصار اللي كانت خايفه منه وأنكشف المستور.... حاولت تهدي بنتها وهي خايفه من رد أبو تركي لما يعرف بزواج ولده من بنت خالته....
.
, عزيزي الزائر / عزيزتي الزائرة منتَدَاكمً مُنتَدَى الملوك يُرَحبُ بكـُمً .. 
إنً كنتَ تَرغَب في الإنضمَامً إلى أسًرَة المنتَدَى سَنتَشَرَفُ بتَسًجيلَكَ .. فَمرُحَبا بالزَائرينَ , وَ العَابرينَ , وَ الأصدقَاء , واَ لأعضَاءَ , بالطَيبينَ وَ الطَيبَات 
.. وَ بكًل مَن يَثًرَى , أوً تَثُرَى المًنتَدَى بالحِوَارً , وَ المُنَاقَشةَ , وَ المسَاهَمَاتً المُفيدَةَ .. فَلَيًسَ للبُخَلاَء بالمَعرفَة مَكَانُُ هُنَا 
..سَاهمَ / سَاهٍمي بكَلمَة طَيبَة , أوً مَقَالً , أوً لَوًحَة , أوً قَصيدَة , أوً فِكرَة , أوً رَأي , أوً خْبرَة تَدفَعً حَيَاتُنَا للأمَامً ... تحيَآت إدَارَة منتَدَى الملوك 
") 
